Charter Document - 02000094

Ceo mustre a nostre seignour le rey e a son conseil Res le fiz Mareduce ke com il en ad droit al chastel de Dyneuor e sire Payn de Chauworth e ses compaignons premistrent a luy de par nostre seignour le rey icel chastel s'il le purreynt conquere sur Res Vaghan e les soens e desicom nostre seignour le rey est ore seisi de cel chastel od les apurtenaunces e le desir mult tenire en la manere k'il le tient le avantdyt Res fiz Mareduce prie nostre seignour le rey k'il luy face avere la value de cel chastel e de tant de terre com al chastel apent aliurs en la terre ou moyns serreit a grevaunce nostre seignour le roy Derechef com Howel ab Griffyn doyt une seute a la curt le avaundyt Res de Lensadorn e memes celuy Howel pus k'il fu fet chevalare de cele seute fere sei ad il sustret le avaundyt Res prie ke il eyt un bref a les bailiffs nostre seignour le rey de Dyneuor a destreindre le avaundyt Howel a fere cele seute a l'avaundite curt com il soleit fere al tens le pere memes celuy Res Derechef com Mareduce ab Res pere le avaundyt Res esteyt fundur del abbeye de Taltleuhau e le abbe de cel leu deyt tenir ses terre de memes celuy Res pur certeyn service fesaund a luy e a nul autre memes celuy Res prie nostre seignour le rey k'il defent a ses baillifs de Dyneuor k'il ne desturbent mye le abbe avaundyt a fere le service a memes celuy Res com a son avowe le quel service il luy deyt fere de dreit