Charter Document - 02000092

[A]nno regni regis Edwardi quinto die dominica in quindena Pasche apud Kermerdin per dominum Paganu[m] de Cadurciis capitaneum munitionis domini regis in West Wall[ia] habentem plenarium potestatem per litteras domini regis patentes recipiendi Walenses ad pacem eiusdem domini regis et fidelitatem assensu et consensu baronum et militum eiusdem munitionis et aliorum militum et fidelium domini regis West Wallie talis facta est conventio super reformatione pacis Resy filii Mereducis videlicet quod de castro de Dinevor et de terra Maynertilau et de terra de Mablaen et de terra de Cayo et Mabelueu dominus Edwardus rex Angl[ie] cum in predictis castro et terris habuerit potestatem dicto Reso plenariam exibebit iustitiam et secundum quod ius suum deposcet predicto Reso plenariam faciet restitutionem Et predictus Resus faciet homagium domino regi ubi sibi placuerit ad suum mandatum et fidelitatem loco domini regis domino Pagano qui locum eius tenet in hac parte Et dominus rex concedit quod dictum Resum sine spontanea eiusdem voluntate nunquam amovebit ab homagio suo nec ipsum distringet vel distringi permittet ad sectam faciendam ad comitatum aliquem vel curiam nisi dominus rex dictum comitatum teneat et habeat in dominico Et dictus Resus militibus et aliis munitionis domini regis concedit in castris suis liberum receptaculum introitum et exitum quotiens voluerint et opus fuerit et quod possent in eisdem sua victualia reponere et ad hoc loca competentia eisdem assignabit Passus etiam tam in terra sua quam aliena per quos guerra domini regis possit promoveri facere permittet consulet et pro suis viribus cum toto posse suo adiuvabit et quotiens opus fuerit cum omni posse suo tam equitum quam peditum ibit in expeditionem guerre quotiens super hoc rationabiliter summonitus fuerit et requisitus Et si contingat quod per consilium et procurationem dicti Resi Griffin[us] filius Mereducis ap Ovayn veniat ad pacem domini regis ea conditione quod dictus Resus eidem remittat ius suum quod habere clamat in Gunyoniuh et Mebunyaun dominus rex dicto Reso alibi secundum quod ius suum deposcet cum plene fuerit declaratum rationabilem faciet restitutionem Hec autem omnia et singula firmiter et fideliter observanda dominus Paganus de Cadurciis pro domino rege et dictus Resus pro se et heredibus suis et suis liberis hominibus quos ad hoc dictus Pagan[us] eligere voluerit et nominare tactis sacrosanctis iuraverunt et huic scripto in modum cyrographi inter partes confecto sigilla sua alternatim una cum sigillis baronum domini regis dicte munitionis et aliorum baronum West Wallie apposuerunt videlicet dominorum Radulphi de Aubenyee Rogeri de Molis Iohannis de Bello Campo Iohannis de Moun Alani de Pluuenet Olyueri de Dinan Pat[ri]cii de Cadurc[iis] Galfridi de Camuile Nichol[ai] filii Martini et Willelmi filii Warini qui omnes presenti conventioni interfuerunt et una cum domino Pagano pro domino rege unanimiter se obligaverunt quod dominus rex omnia in presenti scripto contenta bene et fideliter tenebit et observabit et dominus rex infra ascensionem domini anni prenominati predicto Reso suas litteras faciet patentes confirmatorias Datum die anno et loco prenominatis Et ad maiorem securitatem huius conventionis fideliter observande venerabilis pater dominus R permissione divina Menevensis episcopus presenti scripto sigillum suum apposuit