Charter Document - 02000081

Universis Cristi fidelibus presentes litteras visuris vel audituris Canan[us] filius M[er]educi filii Oweni et abbas et conventus de Strata Florida salutem in domino Noverit universitas vestra quod cum diu litigium et controversia inter nos et homines nostros ex parte una et abbatem et conventum dicti monasterii ex altera hucusque fuerint exorta super limitibus terrarum et finibus tandem ex communi nostro consensu et assensu nulla coactione facta ego Canan[us] pro me et hominibus meis et abbas pro se et conventu suo compromisimus sub pena centum marcarum legitime monete in tres bonos viros probos et discretos videlicet in abbates de Alba Domo et de Karlyon et nobilem virum Griffinu[m] filium eiusdem M[er]eduth sub iure iurando quod arbitrio dictorum trium arbitrorum in omnibus stabimus ratum et gratum habituri quicquid ipsi tres de omnibus predictis terrarum limitibus in periculo animarum suarum decreverint faciendum et statuendum Et si aliqua pars nostrum quod absit contra iudicium et ordinationem supradictorum arbitrorum in aliquo venire vel contraire presumpserit predictas centum marcas in arbitrio vallatas alteri parti arbitrio eorum obedienti sine aliqua contradictione persolvet sub hac condictione videlicet quod dominus rex habeat viginti marcas de predictis centum marcis et ipse distringat et compellat partem rebellem ad observandum plenarie dictum arbitrium et ad solvendum plenarie reliquas octoginta marcas parti predictum arbitrium observanti Et si alique expense fuerint facte ex parte partis obedientis arbitrio ad inquirendum iustitiam suam pars inobediens parti obedienti penitus persolvet Et ut omnia predicta inviolabiliter observentur ego Canan[us] et ego abbas St[ra]te Floride huic scripto patenti sigilla nostra apposuimus Dat Lond die veneris proxima post festum omnium sanctorum anno domini MCC septuagesimo nono