Charter Document - 01990075
| Charter Number: | 01990075 |
|---|---|
| Cartulary Title: | Charters of the Abbey of Coupar Angus |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1304 |
| Date type: | Internal, A.D. |
| Resource Link(s): |
People of Medieval Scotland |
Charter:
Anno gracie MCCC quarto facta est conuencio inter viros religiosos Abbatem et Conuentum de Cupro ex vna parte et Johannem Barbitonsorem Burgensem de Munros ex altera videlicet quod dicti Abbas et Conuentus de communi consensu et assensu tocius capituli sui dimiserunt ad feodi firmam predicto Johanni terram suam in villa de munros Illam scilicet quam Thomas Ogglache de eisdem viris religiosis tenuit Tenendam et habendam predicto Johanni et heredibus suis de predictis Abbate et Conuentu et successoribus suis libere quiete plenaria et honorifice Reddendo annuatim predictus Johannes et heredes sui predictis Abbati et successoribus suis de predicta terra quinque solidos sterlingorum ad duos anni terminos scilicet medietatem ad festum sancti Martini in Hyeme et aliam medietatem ad Pentecosten et faciendo forinsecum seruicium Domini Regis quantum pertinet ad dictam terram et respondendo de omnibus oneribus que de dicta terra secundum legem Burgi aliquo iure vel racione exigi uel requiri poterunt in futurum Et sciendum quod nec dictus Johannes nec aliquis heredum suorum dictam terram vendent impignorabunt vel aliquo modo alienabunt sine dictorum Abbatis et Conuentus consensu et voluntate Et si dicta terra vendi debeat vel impignorari aut aliquo alio modo alienari dicti Abbas et Conuentus pre ceteris dictam terram habebunt pro eodem precio quod pro ea alias dare voluerint uel pro minori Et si contingat quod dictus Johannes vel heredes sui occasione pauperitatis uel alicuius alterius cause domos in dicta terra construendas in bono statu tenere non poterunt vel si firma de vno termino usque ad alium terminum in toto vel in parte prolongata fuerit non soluta licebit dictis Abbati et Conuentui dictam terram in suis manibus saysire et inde suum comodum facere et nihilominus ipsos ad solucionem arreragiorum dicte firme si que debent per namacionem bonorum suorum mobilium et immobilium ubicumque fuerint inuenta vel per censuram ecclesiasticam ubicumque se diuertererint compellere nullo proponendo obstante Et sciendum quod omni casu fortuito contingente siue prospero siue aduerso predictus Johannes et heredes sui predictis viris religiosis dicto modo de predicta firma satisfacient Dicto vero Abbas et Conuentus dictam terram dicto Johanni et heredibus suis contra omnes homines et feminas warantizabunt et defendent In cuius rei testimonium parti huius scripti in modum cyrographi confecti penes dictos Abbatem et Conuentum remanenti sigillum dicti Johannis vna cum sigillo communi ville de Munros est appensum Parti vera alter[o] penes dictum Johannem residenti sigillum commune dictorum Abbatis et Conuentus est appensum
Source (click image below to view full size)
