Charter Document - 01990072

Memorandum quod cum nuper dissensio fuisset inter viros religiosos dominos abbatem et conuentum de Cupro actores ex parte una et Eustachium dominum de Rettref reum ex altera super grauibus et enormis offensis iniuriis et violentiis per predictum Eustachium et suos complices prefatis viris religiosis ausu sacrilego illatis et specialiter propter violentem manum iniectionem in quosdam fratres conuersos dicti monasterii et ea de causa demeritis suis exigentibus per episcopatum Dunkeldensem et alios episcopatus prout euidenter apparet virtute priuilegiorum predictorum virorum religiosorum execucioni prout decet de mandatorum per magistrum Herueum de Crambeth Decanum Dunkeldensem vicarium generalem domini episcopi eiusdem loci ac domini pape capellani ordine iuris in omnibus obseruato publice et sollempniter diutius fuisset excommunicatus et sacrilegus denunciatur cum suis complicibus ac etiam predicta sententia excommunicationis crescente sua contumatia multiplici propter contemptum clauium ecclesiasticarum et rebelliones detestabiles contra ipsum et complices suos in hoc facto legitime extitisset aggrauata tandem predicte dissensionis materia sedata fuit et sopita in modum qui sequitur videlicet quod Die mercurii infra octauam sancti Andree apostoli Anno gracie MCCC secundo prefatus Eustachius coram dicto domino decano et domino archidiacono Dunkeldensi personaliter comparens in presencia dicti domini Abbatis et multorum aliorum antedictos suos reatus de plano fatendo veniam et misericordiam potius postulans quam rigorem supposuit se ex mera et spontanea voluntate sua in omnibus et per omnia ordinationi et voluntati dicti domini Abbatis ad faciendum sufficientem emendam de supradictis excessibus et violenciis dicto domino abbati et suis per ipsum Eustachium et suos ut supradictum est illatis Et ad hoc fideliter faciendum et adimplendum coram dictis ordinarijs in presencia antedicti domini abbatis suprascriptis die et loco fide data in manu dicti domini decani tactis sacrosanctis euangeliis prefatus Eustachius corporale prestitit iuramentum Unde per eosdem ordinarios eidem Eustachio est iniunctum et preceptum quod ipse veniat a magna porta monasterii de Cupro capite discooperto tibiis et pedibus nudis et discalciatis tunica camisia et braceis solummodo vestitus sine cingulo eum virga in manu in capitulum monachorum dicti monasterii certo die pro arbitrio dicti domini abbatis penitenciam recepturus salutarem et emendam facturus de violenciis supradictis sufficientem necnon et coram sepe dictis dominis abbate et conuentu certo die sibi ad hoc statuto ibidem iterato tactis sacrosanctis evangeliis sollempniter iurabit quod eisdem et monasterio suo quamdiu vixerit specialis amicus erit et fidelis Ita quod eorum dampnum aut grauamen nec uidebit nec audiet nec aliquo modo percipiet nec ratificabit quin illud pro posse suo impediet Quod si ipse hoc facere non potuerit illud talibus personis monasterii ostendet quin remedium super hoc possint adhibere nec aliquem sustinebit qui eis dampnum aut grauamen inferat aut inferri procurauerit sed illi sicuti pro facto suo proprio usque ad congruam satisfactionem et emendam aduersabitur incessanter Et ad hoc fideliter et irrefragabiliter obseruanda prenominatus Eustachius unacum Johanne fratre suo qui eodem per omnia reatum constitutus eidem in omnibus satisfaccioni et emende similiter se submisit obligant se et omnia bona sua mobilia et immobilia ubicumque fuerint inuenta ad voluntatem antedictorum abbatis et conuentus sine aliqua contradiccione fore distringenda et eciam si interesse fuerit quod ad simplicem assertionem dicti domini abbatis sine strepitu iudiciali per predictos ordinarios vel eorum alterum premissa adimplere compellantur Et si contingat prenominatum Eustachium aut Johannem contra ipsos articulos suprascriptos vel eorum aliquos contrauenire ue contradicere obligant se et eorum quemlibet in quo debitum contigerit inueniri soluere nomine pene viginti libras bonorum et legalium sterlingorum sine aliqua relaxatione medietatem scilicet decem libras abbati et conuentui de Cupro et aliam medietatem scilicet decem libras fabrice ecclesie Dunkeldensi preter emendacionem transgressionum in quibus rei aut culpabiles fuerint inuenti pena predicta soluta uel non ordinacio predicta precepta et iniuneta in suo robore permaneant et vigore In cuius rei testimonium presenti memoriali unacum sigillis dictorum ordinariorum sigilla dictorum Eustachii et Johannis sunt appensa predictum interlinare scilicet ordinario predicta precepta et iniuncta in suo robore permaneant et vigore fuit appositum ante consignationem huius scripti