Charter Document - 01990064

Frater A[ndree] dominus abbas de cupro et eiusdem loci conuentus collectores decime in subsidium terre sancte concesse in dioecesi Dunkeldensi pro anno tercio concessionis eiusdem decime per venerabilem patrem dominum Johannes dei gracia episcopum karleolensem dicte decime principalem collectorem deputati Discrete viro domino W decano christianitatis Atholie salutem in salutis auctore Cum constet nobis omnes et singulos beneficiatos in decanatu vestro quod decimas sua beneficia contingentes de termino purificacionis proxime preterito ad diem eis prefixum nobis minime persoluerunt per vos denunciatos fuisse suspensas ab ingressu ecclesie propter suam contumaciam et iterate citatos non comparentes propter quod cum crescente contumacia crescere debeat et pena ipsos excommunicauimus Qua propter auctoritate nobis in hac parte commissa in virtute obediencie qua sedi apostolice tenemini et sub pena subscripta in personam vestram ex nunc lata si in exequendo presens mandatum nostrum immo verius apostolicum negligentes fueritis vel remissi vobis precipiendo mandamus quatinus ipsos a nobis sic excommunicatos publice denuncietis Nuntiantes eisdem quod infra instantem diem pasche dictas decimas suas de dicto termino nobis persoluant et hoc Sub pena interdicti in ecclesias suas et sequestracionis bonorum ex nunc late prout ex tunc si dicto die decimas suas nobis non persoluerint Citantes nihilominus eosdem quod compereant per se vel per ydoneos procuratores coram nobis uel procuratoribus nostris uno vel pluribus in crastino dominice qua cantatur Quasi modo geniti proximo future in domo fratrum de monte Carmeli iuxta Perth de dictis decimis suis de dicto termino nobis ad plenum satisfacturi quorum nomina vobis transmittimus in hiis scriptis videlicet decanum ecclesie cathedralis Dunkeldensis Cancellarium eiusdem ecclesie Rectores ecclesiarum de Rathenack de Kylmeuenache de Rogorthyn de monythy de Logynaueloche Tenentem terram de Raccheg Owyne prebendaries de Cathebuchan et de Obenay ipsum etiam prebendarium de Obenay qui decimam suam pro secundo anno prestationis eiusdem nondum soluit quem Abbas et conuentus de Aberbrothoc collectores dicte decime de dicto secundo anno alias excommunicauerunt et interdixerunt sicut patet in literis eorundem dicto domino episcopo karleolensi super hoc missis et sicut aliis a nobis habuistis in mandatis publice excommunicatum denuncietis et interdictum Citantes eundem nihilominus quod compereat coram nobis vel procuratoribus nostris uno vel pluribus dictis die et loco deferens secum illud quod de dicta decima remanet non solutum Annunciantes Abbatibus prioribus et aliis vestri decanatus qui decimam principalem nondum soluerunt quod nobis de dicta decima de dicto termino dictis die et loco ad plenum satisfaciant Alioquin contra ipsos quatenus de jure poterimus eorum inobedientiam puniendo procedemus In signum vero premissorum per vos legitime actorum presentes literas sigillo officii vestri consignetis et nobis per latorem presencium renunciatis Datum apud Cuprum die mercurii proxima post annunciationem dominicam Anno gracie MCC Nonagesimo Quarto