Charter Document - 01960431

Omnibus Cristi fidelibus ad quos presens scriptum pervenerit Hugo Dei gratia Lincoln[] episcopus salutem in domino Cum sine diei certi seu temporis prefinitione soluturi simus nature debitum cupientes ut expedit nobis itinerantibus providere viaticum in presenti et in futuro remedium interveniente dilectorum filiorum Willelmi decani et capituli nostri Lincoln[] assensu dedimus et assignavimus perpetuo ad trium capellanorum unius diaconi et unius subdiaconi vicariorum de choro Lincoln[] per decanum et capitulum successive sicut expedire viderint assumendorum perpetue sustentationis augmentum et ad alios pios usus subscriptos triginta quatuor marcas et dimidiam scilicet duas marcas et dimidiam de ecclesia de Rysum cum primo vacaverit que est de patronatu abbatis et conventus de Exaquio non obstante ordinatione nostra de dictis duabus marcis et dimidia alias facta item viginti marcas de ecclesia de Paxton[] et duodecim marcas de ecclesia de Karleton que quidem ecclesie de advocatione nostra sunt annuatim apud Lincoln[] per manus rectorum ipsarum pro tempore qui per nos et successores nostros patronos earumdem instituendi ipsarum ecclesiarum cum pertinentiis omnia onera ordinaria debita et consueta sustinebunt solvendas periculo et sumptibus eorundem rectorum in duobus anni terminis videlicet in festo sancti Martini de ecclesia de Rysum sexdecim solidos et octo denarios de ecclesia de Paxton[] decem marcas et de ecclesia de Karleton[] sex marcas et tantumdem in festo Penthecost[] ille de predictis capellanis qui perpetuus erit ad id per nos et successores nostros vel sede vacante per dictos decanum et capitulum Lincoln[] preficiendo De qua quidem pecunia idem capellanus quatuor denarios singulis diebus ad opus suum retinebit et solvet dictis duobus capellanis qui quasi ebdomadarii erunt per circuitum utrique denarios tres diacono autem et subdiacono similiter quasi ebdomadariis utrique duos denarios et singulis sabbatis fiet solutio supradicta salvis nichilominus omnibus ipsis stipendiis suis et aliis que eos ratione vicariarum suarum contingunt Et hii omnes vespertinum ac matutinum officium mortuorum cum commendatione tanquam pro corpore presenti pro nobis in loco deputato ad hoc in profestis diebus ante vesperas In festis etiam post vel ante cum commodius poterunt et melius sine dampno vel nocumento servitii ecclesie simul inperpetuum decantabunt Predictus vero sacerdos principalem missam pro nobis specialiter et pro cunctis fidelibus defunctis singulis diebus priusquam canonici ingrediantur chorum ad primum cum diacono et subdiacono indutis albis et sericis celebrabit et cum sollempnitate tanquam pro corpore presenti secundus pro animabus regum et aliorum patronorum ecclesie nostre predecessorum nostrorum patrum et matrum parentum amicorum et benefactorum nostrorum et eiusdem ecclesie nostre et omnium fidelium defunctorum cum oratione speciali pro nobis et cum cantu si voluerit Tertius etiam pro canonicis fratribus et sororibus ecclesie nostre Lincoln[] et pro cunctis fidelibus defunctis Et hii duo singulis diebus celebrabunt ante primum vel post cum commodius poterunt et uni serviet diaconus et alii subdiaconus prenotati Et si forte aliquis eorum infirmitate vel alia de causa prepeditus officium istud ut dictum est temporibus suis exequi non valeat alius de choro ydoneus ad ipsius instantiam illud interim exequetur Alioquin de solutione predicta pro tempore quo defuerit nequaquam sibi respondeatur Ad quod quidem cum predictis assignavimus annuas octo libras cere de bovata terre in Ouresby que fuit Willelmi de Copland[] per manum Stephani de Grafham et heredum vel assignatorum suorum in festo beati Laurentii martyris singulis annis Lincoln[] reddendis prout in carta ipsius Stephani quam de nobis habet continetur Prefatus etiam sacerdos principalis habebit custodiam altaris illius ubi premissa fient librorum etiam et vasorum vestimentorum quoque atque aliorum que ad officium illud pertinent et ad id luminaria duos videlicet cereos trium librarum ad vespertinum ac matutinum officium et dum misse celebrantur et candelas cum necesse fuerit incensum etiam et alia ad predictum officium pertinentia sifficienter inveniet et honorifice Si autem ad aliquam missam de predictis oblatio pervenerit tota simul cum eo quod de predictis triginta quatuor marcis et dimidia supererint post predictorum onerum deductionem cedet in usus sepedicti principalis sacerdotis salvo uno denario ei qui missam celebraverit Illi quoque qui pro tempore dictarum ecclesiarum rectores futuri fuerint instituentur in hac forma scilicet quod predictam pecuniam annuatim terminis statutis sicut predictum est integre solvent et fideliter et hoc etiam coram dictis decano et capitulo iurabunt corporaliter cum per eos inde fuerint requisiti Et si forte quod absit peccuniam sepedictam predicto modo non solverint ad ipsam persolvendam cum satisfactione canonica de termino quolibet non observato et de expensis ob id factis et dampnis que propter hoc evenerint per nos et successores nostros prout iustum fuerit compellentur Nos autem et predicti decanus et capitulum communi assensu sollempniter excommunicavimus omnes illos quicunque contra hanc nostram ordinationem aliquo tempore malitiose venire presumpserint nisi commoniti resipuerint et de contemptu satisfecerint competenter salvis in omnibus episcopalibus consuetudinibus et Lincoln[] ecclesie dignitate Quod ut perpetuam optineat firmitatem presenti scripto sigillum nostrum una cum sigillo predicti capituli nostri Lincoln[] duximus apponendum Hiis testibus Willelmo decano Roberto archidiacono Willelmo cancellario et Waltero thesaurario Linc[] Iohanne Norhampton[] Gilberto Huntingd[] et Amaurico Bedeford[] archidiaconis [Willelmo] subdecano magistris Roberto de Gravel[] Stephano de Cycestr[] Theobaldo et Ricardo de Cantia Galfrido Scoto et Roberto de Bolesover[] capellanis [magistris] Roberto de Brincl[] et Waltero de Well[] Radulfo de Warravill[] Petro de Hungar[] et Willelmo de Winchecumb[] diaconis Ricardo de Oxon[] et Thoma de Aske[by subdiaconis] canonicis Lincoln[] Dat[] per manum Guarini de Kirketon[] capellani canonici Lincoln[] apud Parkum Stowe xvijo kalendas Septem[bris ponti]ficatus nostri anno vicesimo quinto