Charter Document - 01960293

Omnibus Cristi fidelibus ad quos presentes littere pervenerint Hugo Dei gratia Linc[] episcopus eternam in domino salutem Noverit universitas vestra quod cum dilectus in Cristo Radulfus de Normanvill[] confirmasset dilectis in Cristo priorisse et monialibus de Catesby dimidiam marcam in villa de Hotheby percipiendam inperpetuum de qua Alicia uxor eius dederat eisdem in libera viduitate sua sex solidos uno obulo minus et postea octo denarios et obulum in molendino suo de Neubot prout carte dictorum Radulfi et Alicie penes dictas moniales residentes plenius testantur nos ad petitionem eorum interveniente consensu dictarum monialium patronarum ecclesie de Catesby et Iohannis de Helidene capellani eiusdem ecclesie vicarii capellam eis in curia sua de Neubot et cantariam per capellanum proprium sumptibus eorundem ministraturum in ea quotiens ambo vel alter illorum moram fecerit ibidem concessimus sub hac forma videlicet quod capellanus autoritate nostra de consensu monialium et vicarii de Catesby in predicta capella ministraturus eisdem corporaliter prestabit iuramentum quod iura matricis ecclesie quantum in ipso est in omnibus conservabit illesa et quod nullum parochianum suum ad confessionem vel divinorum celebrationem in ipsa capella sine licentia sua recipiet nec aliquod ius ecclesiasticum eis inpendet neque legatum vel privatum denarium aut quemcunque proventum recipiet ab eisdem oblationes etiam omnimodas a quibuscunque factas in dicta capella supradictis vicario et monialibus sub debito iuramenti prestiti fideliter et sine diminutione restituet Predicti quoque Radulfus et Alicia cum tota familia sua subiecti erunt matrici ecclesie de Catesby in omnibus iure parrochiali et omnia iura ecclesiastica persolvent ei tanquam parrochiani et sacramentalia percipient ab eadem hoc solum illis concesso quod liceat eis cantariam predicto modo in predicta capella optinere In precipuis vero solempnitatibus subscriptis tam dicti Radulfus et Alicia si presentes fuerint ibidem quam tota familia sua predictam matricem ecclesiam cum oblationibus debitis et consuetis singulis annis visitabunt scilicet die Natalis Domini die Purificationis beate Marie die Pasche die Pentecost[] et die sollempnitatis ecclesie Si autem contra hanc formam per predictos R et Aliciam vel per capellanum qui pro tempore in predicta capella ministrabit matrix ecclesia dampnificata fuerit in aliquo ex tunc ad questionem dictarum monialium vel vicarii per archidiaconum loci vel per decanum interdicetur capella memorata donec de dampno ipsi ecclesie plene fuerit satisfactum Post decessum autem dictorum Radulfi et Alicie predicta capella a divinorum celebratione cessabit inperpetuum hac huius nostre concessionis gratia tunc penitus expirante salvis in omnibus episcopalibus consuetudinibus et Linc[] ecclesie dignitate In huius rei testimonium presentibus litteris sigillum nostrum duximus apponendum Dat[] per manum Radulfi de War[] canonici Linc[] apud Lidinton[] xi kalendas Augusti pontificatus nostri anno decimonono