Charter Document - 01951169
| Charter Number: | 01951169 |
|---|---|
| Cartulary Title: | Canterbury 1162-1190 Volume 2 |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1177 |
| Date type: | Internal, Calendar |
| Resource Link(s): |
Reference Document for this Embedded Document |
Charter:
Alexander episcopus servus servorum dei venerabili fratri Cantuariensi archiepiscopo apostolice sedis legato salutem et apostolicam benedictionem Ex litteris dilectorum filiorum nostrorum abbatis Rievallensis et prioris de Bridlinton nobis transmissis evidenter accepimus quod cum causam que inter abbatem de Neuhus et abbatissam et moniales de Elnest super ecclesia sancti Petri de Halton diutius est agitata de mandato nostro suscepissent diffiniendam post diligentiorem inquisitionem rei veritate cognita scilicet quod canonici eandem ecclesiam ad presentationem dominorum fundi episcopali canonica institutione adepti fuissent et quod ita ab antiquioribus et honestioribus viris comprovincialibus iuramento prestito iuratum est set et coram eo qui vices archidiaconatus gerebat in comprovinciali capitulo testificatum est quod a quadraginta annis et amplius moniales nunquam eandem ecclesiam possedissent ordine iudiciario terminarunt Quia ergo causas concordia vel iudicio terminatas non decet in recidive contentionis scrupulum revocari fraternitati tue per apostolica scripta precipiendo mandamus quatinus prescriptam ecclesiam de Halton que eisdem canonicis de Neuhus cum omnibus pertinenciis suis est assignata de cetero inconcusse possidendam decernas et quiete facias et pacifice possidere Quod si forte predicte moniales contra sententiam quam predicti iudices quibus causam ipsam commiseramus pro canonicis promulgarunt venire temptaverint fraternitati tue firmiter iniungimus quatinus omni occasione et appellatione cessante perpetuum silentium prenominatis monialibus super eadem ecclesia apostolica auctoritate imponas nullis impedientibus litteris a nobis super hoc impetratis vel impetrandis ita quidem ut sinceritatem sollicitudinis et obedientie tue debeamus non inmerito commendare Verum quoniam predicti canonici non modicum importunis molestiis predictarum monialium possent gravari et sui iuris dispendium sustinere fraternitati tue per apostolica scripta precipiendo mandamus quatinus suffraganeis tuis iniungas ut si forte captata absentia tua memorate moniales aliquando per subreptionem aliquam prelibatos canonicos molestare aut gravare presumpserint excessum illum digna studeant severitate punire ut ceteri timeant similia perpetrare Dat Venet in Rivoalto x kal Iunii