Charter Document - 01950221
| Charter Number: | 01950221 |
|---|---|
| Cartulary Title: | Canterbury 1162-1190 Volume 2 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1180 - 1181 |
| Date type: | Assigned |
| Resource Link(s): |
|
Charter:
Ricardus dei gratia Cantuariensis archiepiscopus totius Anglie primas et apostolice sedis legatus universis sancte matris ecclesie filiis ad quos presentes littere pervenerint eternam in Christo salutem Quoniam exquisitis calumpniantium versutiis ecclesiastica libertas hodie multipliciter impugnatur necesse est ea que religiosis domibus caritatis intuitu sunt collata autenticorum scriptorum munimine roborari ut ad sustentationem eorum qui divinis assidue famulantibus perpetua stabilitate firmentur Ea propter universitati vestre volumus innotescere Eudonem de Arkesdena et Willelmum filium Ernulfi ius patronatus quod in ecclesia de Arkesdena habebant dilectis filiis nostris priori et monachis de Waledena in perpetuam elemosinam concessisse et carta sua confirmasse et prefatos priorem et monachos de Waleden auctoritate venerabilis fratris nostri Gilberti Londoniensis episcopi in ecclesia eadem canonice esse institutos sicut autenticum scriptum eiusdem episcopi super hoc eis indultum evidenter ostendit Hanc itaque predictorum militum donationem et prefati episcopi institutionem sicut rationabiliter facte sunt ratas habentes et firmas ad habuntiorem cautelam in posterum prescriptam ecclesiam memoratis monachis auctoritate qua fungimur confirmamus hanc nostre confirmationis paginam sigilli nostri munimine roborantes statuentes ut nemo ausu sacrilego eam presumat infringere vel ei quacunque temeritate in detrimentum eorumdem monachorum contraire Hiis testibus magistro Girardo Pulcell Walerano Baiocensi archidiacono Willelmo et Moyse capellanis Henrico Baiocensi magistro Rogero Walensi Iohanne capellano Michaele de Burn Gaufrido clerico Rogero decano et aliis multis