Charter Document - 01950215
| Charter Number: | 01950215 |
|---|---|
| Cartulary Title: | Canterbury 1162-1190 Volume 2 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1175 - 1176 |
| Date type: | Assigned |
| Resource Link(s): |
|
Charter:
R dei gratia Cantuariensis archiepiscopus totius Anglie primas et apostolice sedis legatus universis sancte matris ecclesie filiis ad quos presentes littere pervenerint salutem in vero salutari Quoniam diebus nostris ita invaluit et exarsit exsecrabilis fames avaricie ut exquisitis calumpniantium versutiis veritas multipliciter impugnetur et quies iuste possidentium assidue molestetur necesse est ea que deo et ecclesiis vel ecclesiasticis personis in liberam et perpetuam elemosinam iuste collata noscuntur scriptorum autenticorum et testium patrocinio communiri Inde est quod ad universitatis vestre noticiam volumus pervenire quod donationem Michaelis Capre deo et ecclesie beate Marie et sancti Leonardi de bosco de Ginges et fratribus ibidem divino obsequio mancipatis factam et tam a bone memorie Ricardo Londoniensi episcopo quam a sancte recordationis Theobaldo Cantuariensi archiepiscopo confirmatam de una hida terre que est circa predictam ecclesiam et de pasnagio et de decima de proprio feno ipsius Michaelis et de molendino suo et de ligno ad ignem suum ut hec omnia habeant libere et quiete et absque omni servicio seculari sicut prefati Michaelis et predicti Londoniensis episcopi Ricardi carte testantur illis esse concessam et donatam nos quoque concedimus et confirmamus et presentis scripti patrocinio communimus Facta est autem hec nostra confirmatio anno ab incarnatione domini millesimo centesimo septuagesimo quinto ordinationis autem nostre secundo Aput Cantuariam Hiis testibus Benedicto priore Cantuariensi magistro Gerardo magistro Petro Blesensi Rogerio et Willelmo clericis et aliis