Charter Document - 01950193
| Charter Number: | 01950193 |
|---|---|
| Cartulary Title: | Canterbury 1162-1190 Volume 2 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1176 - 1177 |
| Date type: | Internal, A.D. |
| Resource Link(s): |
|
Charter:
Universis sancte matris ecclesie filiis ad quos presentes littere pervenerint Ric[ardus] dei gracia Cantuariensis archiepiscopus tocius Anglie primas et apostolice sedis legatus eternam in domino salutem Cum causa inter monachos Roffenses rectores ecclesie de Chiselherst et Pichardum rectorem ecclesie de Altham super decimis de Modingham in nostra visitacione in diocesi Roffensi coram nobis mota fuisset partibus ante nos vocatis et per procuratores legittime constitutos litteras suas de ratihabicione tocius cause nobis porrectas comparentibus ut earum parceremus laboribus et expensis dilectis filiis nostris N archidiacono Roffensi magistro Waltero Tonitruo et magistro Radulfo de Frendesberi viris equidem probate opinionis dedimus in mandatis ut testes quos utrobique erant producturi super iure et percepcione predictarum decimarum audirent diligenter et attestaciones eorum conscriptas sub sigillis suis ad diem certum cum ipsis partibus ad nostram transmitterent audienciam qui quidem diligenter et devote mandatum nostrum executi sunt Die ergo constituta cum partes copiam sui nobis facerent et testium fuisset renunciatum productioni publicatis tandem attestacionibus cum hinc inde in testes et dicta testium adinvicem multa fuissent proposita et de consensu parcium in causa conclusum demum de iure monachorum Roffensium et possessione antiqua dictas decimas percipiendi plenius instructi et certificati quia tam per dicta testium quam per autenticas litteras Radulfi Willelmi Theobaldi predecessorum nostrorum Cantuariensium archiepiscoporum necnon Gundulfi et Iohannis Roffensium episcoporum quas diligenter inspeximus et manibus tractavimus ac aliis legittimis documentis nobis constat fide plena predictos monachos et eorum ecclesiam Roffensem quaterviginti quatuordecim annis post donacionem ecclesie de Chiselherste quam Gundulfus episcopus eis fecit et ante predictam donacionem tempore prescripto de benivolencia Ansgoti decimas prescriptas ecclesie sue Roffensis nomine pacifice et inconcusse possedisse et postea ex certa sciencia cognoscentes eosdem monachos et eorum ecclesiam Roffensem in omnibus decimis de Modingham in utraque parochia de Chiselherst et Altham existentes antequam ecclesie de Chiselherst fuerant rectores ius sufficiens optinere tanquam ius ecclesie Roffensi appropriatum sine dependencia aliquali ad ecclesias de Chiselherst vel Altham pertinente ipsis monachis et ecclesie Roffensi omnes decimas de Modingham provenientes invocato nomine domini sentencialiter et diffinitive adiudicamus inhibentes sub pena excommunicacionis ne quis eos de eisdem decimis de cetero inquietet Act anno incarnacionis dominice mclxxvi Testibus hiis magistro Gerardo Walerano Baiocensi archidiacono magistro P Blesensi magistro Roberto de Inglesham magistro Rogerio Norwicensi Henrico Baiocensi Rogerio elemosinario Willelmo de Sotindon et aliorum multorum testimonio