Charter Document - 01950160
| Charter Number: | 01950160 |
|---|---|
| Cartulary Title: | Canterbury 1162-1190 Volume 2 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1180 - 1181 |
| Date type: | Assigned |
| Resource Link(s): |
|
Charter:
Ric[ardus] dei gratia Cantuariensis archiepiscopus tocius Anglie primas et apostolice sedis legatus universis sancte matris ecclesie filiis ad quos littere presentes pervenerint eternam in Christo salutem Ex inspectione carte venerabilis fratris nostri G Lundoniensis episcopi manifeste cognovimus quod dilectus filius noster Radulfus de Diceto decanus ecclesie beati Pauli Lundoniensis ad honorem dei et patroni sui beati Pauli domos suas in atrio iamdicte fundatas ecclesie utensilibus suis et ornamentis munitas et capellam suam cum libris et ornamentis omnibus concessione et auctoritate prefati episcopi decanatui assignando contulit et donavit quam donationem idem episcopus ratam habens et acceptam ut perpetua valeat stabilitate gaudere auctoritate sua confirmavit Unde et terram in qua iamdicte domus et capella site sunt decanatui in perpetuum assignavit statuens ut omnis decanorum ecclesie memorate successio ea a sicut scriptum est possideat ita quod decanus ibidem stacionarius habitet et domibus sartiendis curam sollicitiorem impendat Singuli etiam decani decem solidos annuatim in die anniversarii memorati Radulfi decani per manum camerarii nomine predicti tenementi solvent ad pitantiam et hoc se fideliter observaturos coram capitulo in sua institutione cavebunt Provisum quoque est quod siquis in decanum electus de domibus inhabitandis et pro tempore sartiendis et utensilibus earum de libris vasis et ornamentis spectantibus ad capellam fideliter cum indempnitate custodiendis et de decem solidis annuatim solvendis onus in se suscipere noluerit et cautionem idoneam arbitratu capituli detrectaverit interponere commodo careat electionis nec ad decanatum aliquo casu presumat in posterum aspirare Huic siquidem donationi et constitutioni gratum impertientes assensum nostre quoque autoritatis robur duximus accommodandum statuentes et sub interminatione anathematis districtius inhibentes nequis ei tractu temporis aliquatenus temere contraire presumat Unde ad maiorem cautelam in posterum hanc nostre confirmacionis paginam sigilli nostri munimine roboravimus Hiis testibus magistro Girardo Willelmo Gloecestrensi archidiacono Willelmo et Moyse capellanis magistro Rogerio Norwicensi magistro Rogerio Walensi Ricardo et Gaufrido clericis Rogerio decano et aliis multis clericis et laicis