Charter Document - 01950153

Ric[ardus] dei gratia Cantuariensis archiepiscopus totius Anglie primas et apostolice sedis legatus universis Christi fidelibus ad quos presentes littere pervenerint salutem Rem gestam in presentia nostra sub scripti nostri testimonio duximus redigendam ne ex lapsu memorie litigia semel sopita rediviva questione denuo suscitentur In communem itaque volumus noticiam devenire quod cum inter Osbertum priorem et monachos Sancti Pancratii et Thomam clericum de Langheport super sepultura defunctorum apud Facheston quos memorati prior et fratres ad ecclesiam de Langheport querebantur per violentiam laicalem delatos fuisse controversia verteretur et causa nobis a summo pontifice domino Alexandro tertio fuisset delegata tandem intervenientibus amicis presente et consentiente S Malesoures qui et antedictus Thomas capellam de Fagheston ad ecclesiam suam de Langheport asserebant iure parrochiali ab antiquis retro temporibus pertinere inter ipsos sub hac pacis forma convenit Prior et conventus Sancti Pancratii a lite prescripta penitus recedentes in hoc unanimiter consenserunt ut persona ecclesie de Langheport ecclesiam de Facheston cum omnibus eiusdem ville decimationibus et obventionibus et aliis quibuscumque ad eandem ecclesiam pertinentibus iure perpetuo teneat reddendo monachis Sancti Pancratii nomine ecclesie de Facheston XL solidos annuos ita tamen quod prefatus Thomas quoad vixerit et ecclesiam de Facheston tenuerit XXX tantum solidos monasterio Sancti Pancratii annuatim persolvet ad Pascha videlicet XV solidos ad festum Sancti Michaelis XV solidos Post cuius decessum ut dictum est prefati monachi annuos XL solidos a persona de Langheport ad terminos prescriptos iure perpetuo percipient Hec sane transactio hinc inde concessa est et in nostra presentia fide interposita utrobique firmata Nos itaque eam inter predictas ecclesias perpetuis temporibus valituram auctoritate domini pape et nostra duximus confirmandam et sigilli nostri munimine roborandam