Charter Document - 01950136

Universis Christi fidelibus ad quos presentes littere pervenerint Ric[ardus] dei gratia Cantuariensis archiepiscopus totius Anglie primas et apostolice sedis legatus salutem in domino Sicut boni iudicis est semper lites minuere ita ad ipsius spectat diligentiam ne cum semel decise fuerint rediviva valeant suscitari questione Ea propter tam ad presentium quam ad futurorum volumus noticiam pervenire quod causam que inter venerabilem fratrem nostrum R Herefordensem episcopum et Hugonem Parvum super ecclesiis de Mortona et Waddona diutius agitata fuerat quas idem episcopus ad ius Herefordensis ecclesie pertinere asserebat a sede apostolica omni appellatione remota cognoscendam et terminandam suscepimus Partibus itaque sub presentia nostra constitutis cum post diligentem et studiosam examinationem constaret nobis tam per venerabilis fratris nostri G Lundonensis episcopi testimonium tunc temporis ecclesie Herefordensi presidentis quam etiam aliorum multorum integre opinionis virorum iuratorum attestationibus pretaxatas ecclesias sepedicte ecclesie Herefordensi a Rogero Parvo patre Hugonis Parvi qui in predictis ecclesiis ius patronatus habebat in perpetuam prebendam concedente et confirmante hoc bone memorie diocesano episcopo Iohanne canonice fuisse collatas et ab eadem ecclesia Herefordensi diutius et quiete possessas predicto episcopo et ecclesie Herefordensi easdem ecclesias videlicet de Mortona et Waddona assidentibus nobis viris honestis et discretis adiudicavimus ita quidem ut tam de proprietate quam de possessione nichil in posterum supersit questionis Et ne hec decetero in dubium revocentur et testium subscriptione et sigilli nostri appositione ea duximus communire His testibus magistro Girardo Waleranno archidiacono Baiocensi magistro Petro Blesensi Radulfo de Wingaham Willelmo de Norhal Radulfo de Sancto Martino magistro Roberto de Inglesham Willelmo Cadomensi Nicolao de Leuekenora magistro Waltero scriptore Willelmo de Stokes Amico clerico et aliis multis