Charter Document - 01950090
| Charter Number: | 01950090 |
|---|---|
| Cartulary Title: | Canterbury 1162-1190 Volume 2 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1177 - 1179 |
| Date type: | Assigned |
| Resource Link(s): |
|
Charter:
Ric[ardus] dei gratia Cantuariensis archiepiscopus totius Anglie primas et apostolice sedis legatus universis Christi fidelibus eternam in domino salutem Notum sit omnibus tam presentibus quam posteris quod causa que vertebatur inter conventum ecclesie Christi Cantuariensis et Rogerum de Toftes super ecclesia de Toftes hoc fine conquievit Predictus siquidem Rogerus in presentia nostra constitutus coram pluribus viris honestis et discretis confessus est quod bone memorie Willelmus quondam Norwicensis episcopus ad representationem ipsius Rogeri concesserat ipsam ecclesiam de Toftes ecclesie Christi Cantuariensi et fratribus monachis ibidem deo famulantibus in perpetuam elemosinam et carta sua quam oculis nostris perspeximus confirmaverat Prior vero ecclesie Cantuariensis Herlewinus de assensu conventus propter bonum pacis et ut omnis controversia inter conventum ecclesie Christi Cantuariensis et ipsum Rogerum et heredes suos sopiretur eidem Rogero concessit quod vicarium quem ipse Rogerus et heredes sui prefato priori Cantuariensis ecclesie et conventui idoneum presentaverint sine dolo et malo ingenio recipient et eum Norwicensi episcopo instituendum in perpetuum vicarium eiusdem ecclesie de Toftes presentabunt qui vicarius iiii solidos annuatim conventui ecclesie Christi Cantuariensis fideliter in festo beati Iohannis baptiste vel infra octavas perpetua pensione persolvet ita ut de eadem ecclesia nunquam amplius exiget conventus ecclesie Christi Cantuariensis preter hanc statutam pensionem neque eosdem iiii solidos alicui persone extra ecclesiam Cantuariensem assignabunt neque alium vicarium presentabunt episcopo Norwicensi ad eam ecclesiam instituendum nisi illum quem sepe dictus Rogerus vel heredes sui eis idoneum presentaverint neque Rogerus vel heredes sui alium nisi quem prior et conventus ecclesie Cantuariensis ad eorum representationem idoneum receperint ad eandem ecclesiam de Toftes in vicarium vel personam aliquatenus presentabunt Hanc quoque conventionem sine dolo et malo ingenio tenendam memoratus Rogerus fide interposita firmavit firmiter et inviolabiliter observandam Et ut ipsa futuris temporibus perpetuam obtineat firmitatem presenti scripto eam confirmamus et sigilli nostri patrocinio communimus Testibus Walerano archidiacono Baiocensi Willelmo archidiacono Glouecestriensi Henrico Baiocensi Willelmo de Sottindon Rogero elemosinario Rogero Norwicensi et aliis multis