Charter Document - 01950085

Ric[ardus] dei gratia Cantuariensis archiepiscopus tocius Anglie primas universis Christi fidelibus ad quos littere iste pervenerint eternam in domino salutem Res gesta scripto provide commendatur ne vel a memoria hominum possit elabi vel si forte tractu temporis oblivionem incurrerit suffragante litterarum testimonio ad memorie certitudinem reparetur Ea propter ad omnium notitiam volumus pervenire quod cum in ecclesia Cantuariensi simplicem adhuc claustralis monachi vitam ageremus Willelmus filius Radulfi dominus fundi de Einesford in pretaxata Cantuariensi ecclesia habitum monachilem suscepturus presente et assensum prebente per omnia Willelmo de Einesford filio et herede suo cognomento Gurham nobis et multis aliis videntibus ecclesiam sancti Martini de Einesford cum omnibus ad eam pertinentibus per scutellam argenteam et cultellum unum super altare ecclesie Christi Cantuariensis obtulit et in perpetuam concessit atque donavit elemosinam Unde cum processu temporis super eadem donatione inter ecclesiam Cantuariensem et nos et Willelmum de Einesford nepotem predicti Willelmi filii Radulfi orta fuisset controversia et ad audientiam domini Henrici illustris Anglorum regis tandem deducta ita de assensu eiusdem regis inter dilectos filios nostros monachos Cantuarienses et nos et memoratum Willelmum nepotem prelibati Willelmi filii Radulfi qui ecclesiam de Einesford ecclesie Cantuariensi sub hac condicione datam fuisse asserebat ut cum eandem ecclesiam de Einesford vacare contingeret manerium de Roching ad liberum dominium domini de Einesford redire deberet convenit ut presentibus nunciis domini regis de predicta donatione sed et condicione prelibata si forte inserta fuit in capitulo Cantuariensi per fratres eiusdem capituli sub anathematis periculo veritas eliceretur Unde presentibus tandem in eodem capitulo nunciis domini regis ad hoc specialiter destinatis videlicet Gilleberto de Colevill et Willelmo Malduit domini regis camerario et Willelmo filio Nigelli presentibus nihilominus Willelmo de Einesford nepote Willelmi filii Radulfi et Willelmo eiusdem Willelmi filio ac herede Roberto quoque filio Bernardi et multis aliis super veritate dicenda excommunicacionis sententiam expresse protulimus qua prolata tam a nobis quam ab aliis omnibus acclamatum est unanimiter et publice protestatum quod de predicta condicione nichil omnino sciebant vel eciam audierant Plures quoque eorundem fratrum una nobiscum sollempniter protestati sunt sepe dictam ecclesiam de Einesford pure et sine condicione qualibet ecclesie Cantuariensi fuisse collatam Quoniam ergo eadem ecclesia de Einesford ecclesie Cantuariensi a nullo predecessorum nostrorum hactenus confirmata est sed tantum simplex a laico facta fuit inde donacio volentes quod minus actum est ad perfectionis plenitudinem deduci prescriptam ecclesiam de Einesford cum capellis de Stanes et de Freningham et terris decimis et omnimodis possessionibus ad ecclesiam ipsam vel capellas pertinentibus ecclesie Cantuariensi ad usus pauperum elemosinarie in liberam et perpetuam elemosinam concedimus et confirmamus ita quidem ut cum eandem ecclesiam de Einesford vacare contigerit decime oblationes et omnimode obventiones de ea provenientes in usus pauperum elemosinarie libere convertantur salva nobis et successoribus nostris in iam dictis ecclesia et capellis canonica iustitia quatinus in eisdem scilicet divina exhibeantur obsequia per idoneos vicarios a dilectis filiis nostris monachis ecclesie Cantuariensis nobis vel successoribus nostris presentandos et instituendos salva eciam dilecto filio nostro Gentili nepoti sancte memorie A quondam summi pontificis donacione quam eidem Gentili fecimus de predicta ecclesia quamdiu eam tenuerit Hoc quoque duximus adiciendum quatinus si forte vacante sede cui ad presens disponente domino presidemus antefatam ecclesiam de Einesford vacare contigerit prelibati monachi nihilominus eam libere ingredientur et decano loci ad exhibenda divina officia idoneum vicarium presentabunt quem ab ipso decano sine molestia qualibet recipi volumus atque precipimus Ut ergo hec nostra concessio firma et inconvulsa permaneat eam presenti scripto confirmamus et sigilli nostri apposicione roboramus statuentes et sub interminacione anathematis prohibentes nequis hanc nostre confirmationis seu concessionis paginam infringere vel ei aliquatenus temere contraire presumat Testibus his magistro Gerardo Walerano Baiocensi Petro Batthoniensi et Willelmo Gloecestriensi archidiaconis magistro Roberto de Inglesham Henrico Baiocensi magistro Rogerio de Roulvest[on] Gilleberto de Piris Galfrido clerico magistro Rogerio Walensi Willelmo de Sotindona et multis aliis tam clericis quam laicis