Charter Document - 01950050
| Charter Number: | 01950050 |
|---|---|
| Cartulary Title: | Canterbury 1162-1190 Volume 2 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1181 - 1183 |
| Date type: | Assigned |
| Resource Link(s): |
|
Charter:
Ricardus dei gratia Cantuariensis archiepiscopus totius Anglie primas dilectis filiis archidiaconis vicearchidiaconis decanis et universis officialibus ecclesie Lincolniensis salutem in Christo Ad notitiam vestram pervenire volumus nos sub speciali protectione Cantuariensis ecclesie et nostra ecclesiam de Bard suscepisse et personas ac possessiones universas ad eandem ecclesiam pertinentes salvo quidem iure Lincolniensis ecclesie Prohibemus igitur ex parte dei et ecclesie Cantuariensis ac nostra ne quis vestrum in abbatem eiusdem ecclesie vel monachos suos aut in ipsam ecclesiam sive in alias ecclesias parochiales ad eam pertinentes vel in capellanos earum aut in alias personas sibi servientes citra cause legitimam cognitionem et iuris ordinem interdicti vel suspensionis aut excommunicationis sententiam ferre presumat Si contra hanc prohibitionem nostram factum fuerit profecto sciatis quod ex quo ad nostram notitiam querela pervenerit quod a vobis citra iuris ordinem ad iniuriam ecclesie Cantuariensis et nostram factum fuerit irritabimus et pena sequente docebimus qualiter debueritis nostris prohibitionibus obedire Valete