Charter Document - 01940042
| Charter Number: | 01940042 |
|---|---|
| Cartulary Title: | The Priory of Hexham |
| Charter Language: | Latin |
| Charter Origin: | Religious |
| Charter Type(s): | Mandate |
| Date: | 1315 |
| Date type: | Internal, A.D., Calendar |
| Resource Link(s): |
Borthwick Institute - Register 8 (f54v) |
Charter:
Willelmus dilectis filiis universis et singulis Prioribus et Conventibus canonicorum regularium de ordine Sancti Augustini nostre dioecesios salutem Inter opera caritatis qua quisque fidelis ex precepto Domini proximo suo astringitur attestante veritate Evangelica continetur ut ex affectu proximum diligat et necessitate urgente quo tempore communicanda est bonorum substantia ad subveniendum necessitati proximi se et sua exhibeat cum effectu Ceterum si hec inter quoscumque fideles Christi pro salutis remedio et legis observantia sint servanda quanto fortius inter religiosas personas presertim ejusdem ordinis et dioeceseos istius caritatis indeficientis exhibitio requiretur Cum itaque religiosi viri Prior et Conventus monasterii de Hextildesham vestri ordinis propter invasiones et depredationes Scottorum inimicorum Dei ac regni et ecclesie Anglicane bonis eorundem religiosorum ex quibus victum habere consueverant et habebant per dictos inimicos invasis combustis penitus et consumptis vel etiam asportatis nichil omnino ad presens habentes unde valeant sustentari quod dolenter referimus compellantur dispersionis sentire incommodum et per mendicitatem incertam nisi aliunde eis subveniatur querere sibi victum Nos ex pastoralis sollicitudinis officio ad prefatos religiosos subditos nostros ex persecutione dictorum inimicorum crudeli et invasione nefaria desolatos nostre mentis intuitum convertentes ne in ipsius religionis et totius cleri obprobrium cogantur quod absit publice mendicare devotionem vestram obnixius rogamus hortamur in Domino et nihilominus sub obtestatione Divini judicii vos monemus quatinus cum per Priorem dicti monasterii aliquis ejusdem canonicus ad vos singulariter missus fuerit ex hac causa eundem sic missum benigne admittatis et fraterna caritate in Domino pertractetis donec hostili persecutione cessante cum pace ad locum in quo professi fuerant annuente Altissimo valeant remeare Speramus siquidem pro certo prout Prior dicti monasterii nobis asseruit quod mora singulorum eorundem fratrum apud singula vestra monasteria non erit vobis nimium onerosa Has nostras preces exhortationes et monitiones intra benigne exauditionis januam tam favorabiliter admittentes ac efficaciter adimplentes ne manus cohercionis debite et compulsionis accomode nos oporteat apponere ad premissa Valete Data apud Cawode nonis Februarii anno gratia millesimo tres centesimo quarto decimo