Charter Document - 01940039

Willelmus [] dilectis filiis Prioribus monasteriorum de Hextildesham et Boulton in Craven ordinis Sancti Augustini capitulo generali ejusdem ordinis infra nostram dioecesim ut elicitur presidentibus salutem [] Sacrosanctam ecclesiam matrem nostram sic disposuit Deus gloriosus et sublimis ut qui certis suis subditis presidentes inferioris tamen gradus locum optinent in eadem juri suorum superiorum minime valeant derogare ne si cuique sua jurisdictio non servetur ecclesiasticus ordo proculdubio confundatur Sane nuper quedam monasteria vestri ordinis jure ordinario visitantes comperimus per vos vel alios dudum vestris capitulis presidentes aliqua fuisse statuta seu etiam ordinata quorum occasione nonnulli fratrum vestrorum in visitatione nostra in quibusdam monasteriis vestri ordinis nuper facta excessus crimina et defectus quorum reformatio et correctio per Priores proprios etiam scienter et absque causa legitima omissa fuerat nobis non audebant per nos astricti sub obedientie debito revelare Que impunitatem et fomentum criminum et excessuum dare poterunt et in juris nostri manifestum prejudicium redundare Quocirca devotioni vestre in virtute sancte obedientie firmiter injungimus et mandamus quatinus si qua hujusmodi per vos aut alios vestris capitulis presidentes ordinata fuerint vel statuta que in juris aut jurisdictionis nostre prejudicium cedere valeant quovis modo aut correctiones criminum et excessuum seu reformationem defectuum in personis vel in rebus monasterii vestri ordinis nobis ubi libet subjectorum que in visitatione nostra facienda imminent quomodo libet valeant impedire ipsa sine more dispendio revocetis Nos enim auctoritate Constitutionum felicis recordationis domini Bonifacii pape VIII omnia et singula hujusmodi per vos vel alios quoscumque vestris capitulis presidentes ordinata vel statuta per que effectus debitus visitationis nostre in monasterio vestri ordinis nobis ubi libet subjectis juri ordinario facte vel etiam faciende quomodo libet valeat impediri una cum sententiis juramentis promissionibus obligationibus seu quibus vis penis aliis in hujusmodi ordinationibus vel statutis contentis omnino irrita esse decernimus et etiam declaramus et nullius penitus existere firmitatis Nec quemquam fratrum vestri ordinis nobis jure ordinario subjectorum hujusmodi sententiis juramentis promissionibus seu penis aliis quibuscumque ex premissa causa obligari aliqualiter vel astringi Citantes nichilominus peremptorie vos Priores de Hextildesham et Boulton generali capitulo vestri ordinis nunc ut dicitur in nostra dioecesi presidentes quod tertio die [] post festum Sancti Martini Yemalis ubicumque tunc fuerimus in nostra dioecesi com pareatis personaliter coram nobis premissas ordinationes et statuta exhibituri ac super eisdem audituri facturi et recepturi quod canonicis convenerit institutis Certificantes nos citra festum Sancti Martini predictum quid feceritis et faciendum duxeritis in premissis per vestras patentes literas harum seriem continentes Valete Data Scroby decimo die Octobris pontificatus nostri anno octavo