Charter Document - 01940034
| Charter Number: | 01940034 |
|---|---|
| Cartulary Title: | The Priory of Hexham |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1311 |
| Date type: | Internal, A.D., Calendar |
| Resource Link(s): |
Borthwick Institute - Register 7 (f105r) |
Charter:
Universis Willelmus [] salutem in Domino sempiternam Illos qui in regimine sibi commisso diutius laudabiliter et utiliter pro viribus laborarunt justum et pium arbitramur condignis beneficiis prosequi et eorum necessitatibus ex paterna benivolentia providere Attendentes itaque quod frater Thomas de Fennewyk Prior monasterii de Hextildesham nostre jurisdictionis in suo officio per longa tempora laudabiliter et utiliter laboravit et ob hoc affectantes quod preter premium quod a bonorum omnium Retributore expectat tantum tamque diutinum laborem suum sentiat in diebus ultimis sibi saltem in aliquo fructuosum de consensu totius Conventus prefati monasterii de Hextildesham pariter et assensu de statu dicti fratris Thome jam senio et labore confracti sic duximus ordinandum Videlicet quod idem frater Thomas cum prefati Prioratus regimine cesserit aut absolutus fuerit ab eodem cameram illam inhabitet que dormitorio ex parte orientali est contigua sumptibus ejusdem monasterii sustinendam ac etiam reparandum ut curis terrenorum funditus exutis Deo cui servire regnare est in sancte contemplationis otio ac Divinorum obsequio ibidem libere valeat famulari Ordinamus insuper quod idem frater Thomas quamdiu vixerit de monasterio memorato duas integras liberationes canonicales percipiat pro se ipso et tertiam pro uno canonico sibi associando singulis delicet diebus tam in pane vino et cervisia quam de coquina et aliis necessariis quantum tribus est canonicis ejusdem monasterii liberatum necnon focale ac candelam de cepo et cera quantum ei fuerit necessarium De speciebus autem sicut uni canonico volumus liberari Ad hec etiam concedimus eidem unum corrodium pro vallecto suo et aliud corrodium pro garcione suo ac tertium corrodium pro uno pagio et robas pro eisdem annuatim sicut alii vallecti garciones et pagii Prioris qui pro tempore fuerit percipiunt in monasterio memorato Ordinamus insuper et concedimus eidem unam capam et unam tunicam a Priore ejusdem monasterii sibi annis singulis liberandas Et preter premissa concedimus eidem fratri Thome decem libras argenti bone et legalis monete pro aliis sibi necessariis annis singulis quoad vixerit [a] bursariis ejusdem monasterii percipiendas et ad duos anni terminos videlicit in festo Natalis Domini quinque libras et in festo Nativititis Beati Johannis Baptiste quinque libras Et si contingat predictum fratrem Thomam pro suis aut ejusdem monasterii negotiis seu causa recreationis aut alia quacumque honesta monasterium exire predictum ordinamus quod Prior qui pro tempore fuerit equitaturam sibi pro se et uno canonico et uno armigerio et hernesio sibi necessario inveniat competentem Hec autem omnia et singula per nos ut premittitur ordinata et eidem fratri Thome concessa Priori ejusdem monasterii qui pro tempore fuerit ac singulis de Conventu in virtute sancte obedientie et sub interminatione anathematis injungimus inviolabiliter observanda In quorum omnium testimonium sigillum nostrum una cum sigillo communi capituli monasterii de Hextildesham predicti presentibus est appensum Acta et data apud Hextildesham iij kalendas Maii anno gratie MCCC undecimo
Source (click image below to view full size)
