Charter Document - 01870102

A touz yieux qi ceste lettre verront ou orrount William de Beauchamp counte de Warr salutz en notre Sire Pur ceo qe nous avons achatee une place de terre en la ville de Warr a nous et a noz heirs de Nichol de Salteford clerc et de ces heirs la quele place est en la Rue du Chastel entre le mies qe Richard le quarreer acun temps tient e la venelle qe vient de Sholone la quele place est charge de sys deners de annuel rent a Dieu et a lesglise de notre Dame de Warr et a les chanoynes illeoec Dieu servantz Dount en allouance et en eschaunge de la rent avantdit avons grauntee et assignee sys deners de annuele rent a Dieu et a lesglise avantdite de Warr et a les chanoynes illeoc dieu servannz pur nous et pur noz heirs a remanant a resceviere de un place qe Robert le fitz Elys tient en Warr en la rue gest appelle la Jurye et est entre le mies mesmes celuy Robert y le fitz Elys et le mies Roger de Koventree la quele rent nous avons du donn Roberd Gegge de Warr issi qe les chanoynes avantditz pur lavantdit rent de sis deners puissent destreindre en la place avantnomee si sovent come mester lour serra En tesmoynance de ceste chose en ceste lettre avons mys notre seal par yces tesmoignes Thomas Pavy de Warr John de la Forte Robert le Taverner done provost de Warr Nichol le Espiscer Thomas Thoth e autres assez Done a Hamslap le Samady prochein avant le feste seint Piere in Chathedralan du regne le roy Edward le fitz le roy Henry vintisme quart