Charter Document - 01870054

Innocentius episcopus servus servorum Dei dilectis filiis [] abbati de Crek et Suffolcie et [] Midelsexie archidiaconis Norwicen et London diocesium salutem et apostolicam benedictionem Dilecti filii decanus et canonici ecclesie beate Marie de Warwic sua nobis petitione monstrarunt quod cum archidiaconus Wigorn contra ipsos ad [] priorem sancti Guthlaci Hereforden et conjudices suos super subjectione ac visitatione quas assent se habere in ecclesia ipsa et rebus aliis litteras apostolicas impetrasset eisdem judicibus [] decano Hereforden et collegis suis committentibus super hoc totaliter vices suas dicti decanus et canonici ex eo sentientes ab ipsis subdelegatis indebite se gravari quod iidem procuratorem eorum legitimum mandatum ad hoc sufficiens exhibentem admittere contra justitiam denegantes cum causa rationabili non subesset propter quam ipsi personaliter comparere deberent in commisso sibi negotio in eorum prejudicium nichilominus procedebant nostram audientiam appellarunt Quocirca discretioni vestre per apostolica scripta mandamus quatinus si est ita revocato in statum debitum quicquid post huiusmodi appellationem inveneritis temere attemptatum in causa ipsa juxta priorum litterarum continentiam appellatione remota ratione previa procedatis alioquin partes ad eorundem subdelegatorum remittatis examen appellantes in expensis legitimis condempnando Testes autem qui fuerint nominati si se gratia odio vel timore subtraxerint per censuram ecclesiasticam appellatione cessante cogatis veritati testimonium perhibere Quod si non omnes hiis exequendis potueritis interesse duo vestrum ea nichilominus exequantur Dat Lugdun xvii kalendas Julii pontificatus nostri anno tertio