Charter Document - 01800076
| Charter Number: | 01800076 |
|---|---|
| Cartulary Title: | Memorials of the Church of SS. Peter and Wilfried, Ripon |
| Charter Language: | Latin |
| Charter Origin: | Religious |
| Charter Type(s): | Foundation |
| Date: | 1314 |
| Date type: | Internal, A.D., Calendar, Episcopal |
| Resource Link(s): |
Borthwick Institute - Register 8 (f19v) |
Charter:
Universis Sancte matris ecclesie filiis presentes litteras visuris vel audituris Willelmus permissione Divina Ebor archiepiscopus Anglie Primas salutem In amplexibus Salvatoris Ea noscitur esse consideracio Deo grata per quam Divini cultus procuratur augmentum per frequentem maxime celebracionem missarum In qua corporis et sanguinis Dominici conficitur sacramentum et pro salute fidelium immolatur illa salutaris hostia Deo Patri Hec namque inter cetera meritoria opera et institucionis Dominice sacramenta beatificatis summe cedit ad gloriam et penam minuit animabus adhuc In purgatorio constitutis attendentes itaque tantum et tam excellentem hujus sacramenti effectum ad Dei Omnipotentis honorem et anime nostre ac parentum et benefactorum nostrorum salutem In capella nostra quam construi fecimus In manerio de Rypon de consensu capituli nostri Ebor unam cantariam perpetuam ordinandam ad sustentacionem unius capellani In dicta capella perpetuo celebraturi quoddam mesuagium cum duodecim acris terre arabilis quinque acris prati et tribus acris bosci et pasture cum pertinenciis In Dall juxta Thorneton quod fuit quondam Willelmi de Desert et quoddam mesuagium In villa Rypon cum pertinenciis situm In vico omnium Sanctorum inter mesuagium magistri Willelmi de Sweynby ex parte una et mesuagium Emme de Clotherum ex altera necnon redditum annuum sexaginta et quatuordecim solidorum qui de nativis tenentibus dicti manerii Rypon per ballivum ejusdem annis singulis levari consueverunt et custodi domuum et clausi dicti manerii pro ejusdem custodie onere assignari videlicet omni die duos denarios pro victu cotidiano ejusdem custodis et ad robam suam annis singulis unam marcam de consensu expresso capituli nostri predicti ac serenissimi principis et domini nostri domini Edwardi regis Anglie illustris licencia speciali magistro Willelmo de Sweynby capellano cui dictam cantariam contulimus intuitu caritatis ipsumque domuum et clausi dicti manerii custodem deputavimus et ejus successoribus In dicta capella celebraturis ac domuum et clausi dicti manerii custodiam habituris auctoritate pontificali damus concedimus et inperpetuum assignamus ordinamus insuper et sub obtestacione Divini judicii futuris perpetuo temporibus inviolabiliter decernimus ut quandocumque et quocienscumque dictam cantariam post obitum nostrum ex quacumque causa vacare contigerit ordinacio collacio seu provisio ejusdem cantari persone idonee facienda ad Capitulum nostrum Ebor pertineat una cum jurisdiccioni omnimoda spirituali immediata In per capellani qui pro tempore fuerit necnon destitucione si suis culpis exigentibus eum viderint amovendum hoc tamen adhibito moderamine ut si dictam cantariam quovis modo vacare contigerit per decem dies continue numerandos successores nostri qui pro tempore fuerint pro dicta cantaria et custodia domuum et clausi manerii sepe dicti possint de persona idonea providere Preterea statuimus et eciam ordinamus quod quilibet capellanus In dicta capella ut premittitur celebraturus propter honorem ecclesie Rypon singulis diebus Dominicis et eciam solemnibus et festivis In Ecclesia ipsa sicut ipsius ecclesie vicarii et ministri ceteri habitum gestet et misse majori ac processionibus quociens eas fieri contigerit publice intersit nisi infirmitate vel alia evidenti et legitima causa fuerit impeditus ut igitur premissa omnia et singula robur obtineant perpetue firmitatis presentem scripturam sigilli nostri appensione fecimus communiri Acta et data apud Cawode xv die mensis Octobris Anno Gracie Millesimo CCC quarto decimo et pontificatus nostri nono