Charter Document - 01761297
| Charter Number: | 01761297 |
|---|---|
| Cartulary Title: | The White Book of Peterborough. The Registers of Abbot William of Woodford, 1295-99 and Abbot Godfrey of Crowland, 1299-1321. |
| Charter Language: | Latin |
| Charter Origin: | Religious |
| Charter Type(s): | Request |
| Date: | 1320 |
| Date type: | Assigned |
| Resource Link(s): |
Reference Document for this Embedded Document |
Charter:
Venerabilibus religionis venerande dominis dominis abbatibus de Rames et de Waleden presidentibus capitulo generali monachorum ordinis sancti Benedicti provincie Cant necnon et ceteris abbatibus ac prioribus proprios abbates non habentibus ordinis et provincie predictorum frater Johannes permissione divina Norwyc episcopus salutem et sincere dilectionis in Domino continuum incrementum Vigor exigit rationis omnes et singulos unius professionis vinculis involutos ea appetere opere affectuali subsequente que comodum et honorem ordinis huiusmodi non mediocriter concernere dinoscuntur Sane ex fida quorumdam relatione didicimus locum in quo scolares vestri monachi Oxon studendi et in divina pagina non solum sibi ipsis sed et confratribus suis ac Christicolis universis proficiendi causa moram trahunt variis inhabitationis incommodis ut de suorum ruinis edificiorum ut pretenditur taceatur subici hiis diebus pro quibus relevandis vos omnes et singuli nedum ex debito honestatis sed et vinculo fraterne communionis quo singuli singulis et singuli universis communi utilitate pensata cogimini mutuo vobis invicem subvenire debetis pro viribus manus apponere plurimum adjutrices Cum itaque fratres de Monte Carmeli suum locum loco dictorum scolarium vestrorum Oxon contiguum cum suis edificiis iam dimiserint et ipsum totaliter deserendo ac locus ipse vestris com monachis supradictis non tam utilis quam per maxime necessarius existat prout vestrum quilibet sana conscientia inde poterit esse testis Vestram in communi requirimus caritatem vos omnes et singulos singulariter totis precordiis exortantes quatinus pro prefato loco deserto adquirendo et predicto loco scolarium adnectendo contributione facta in communi absque procrastinatione morosa et murmure qualicumque vires apponere effectualiter non tardetis Nos enim circa expeditionem premissorum religionis optentu ac utilitatis communis ut prefertur vobis et vestris nunciis assistemus pro viribus cum consilio et presidio in quantum poterimus oportunis Considerantes si placet quod multa ex inopinato contingere possunt in hoc casu que pium et vestrum Deo gracium desiderium segregare poterunt ab effectu quod si premissa ad vestram noticiam celeriter deduci nequeant in communi vos domini presidentes ceteris omnibus nostri vestris apicibus dignemini ea quam citius intimare et quid per vos actum fuerit in premissis Vos domini presidentes vel saltem alter vestrum dignemini vel dignetur nos expeditis expediendis reddere certiores ad sancte religionis augmentum vos omnes conservet altissimus in prosperitate votiva per tempora feliciter duratura Scriptum London ix kalendas Decembris