Charter Document - 01761155
| Charter Number: | 01761155 |
|---|---|
| Cartulary Title: | The White Book of Peterborough. The Registers of Abbot William of Woodford, 1295-99 and Abbot Godfrey of Crowland, 1299-1321. |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1274 - 1295 |
| Date type: | Assigned |
| Resource Link(s): |
Reference Document for this Embedded Document |
Charter:
Universis Christi fidelibus presens scriptum visuris vel audituris Ricardus de London miseratione divina abbas de Burgo Sancti Petri salutem in Domino sempiternam Noverit universitas vestra nos concessisse ordinasse et statuisse pro nobis et successoribus nostris perpetuis temporibus observandum ad honorem Dei et utilitatem tam hospitalitatis quam elemosine ac religionis augmentum pacem et quietem tam obedientiariorum quam capituli nostri quod conventus habeat de cetero granarium per se suis sumptibus construendum et reparandum Et quod custos granarii predicti de communi consilio constitutus recipiat de granario abbatis qui pro tempore fuerit totam liberationem que ad conventum spectare consuevit secundum antiquam assisam frumenti brasei cuiuscumque generis bladi fuerit per predictum custodem distribuendam et in usus pios convertendam Ita quod custos qui pro tempore fuerit habeat electionem tocius frumenti abbatis brasei et pisarum secundum assisam predictam videlicet de frumento singulis diebus j quartarium et j eskeppam per mensuram regiam et singulis ebdomadis dimidium quartarium et dimidiam eskeppam frumenti de assignatione domini Roberti de Lindeseye abbatis pro viij monachis per ordinationem suam ad conventum augmentatis preter particulares donationes que distribuuntur in principalibus festis et in die absolutionis ad mandatum et preter alias particulas minutas que sepe contingunt per annum Idem eciam custos percipiet de braseo singulis ebdomadis quando braciatur de puro ordeo xviij quartario et v eskeppas de braseo ordei Quando autem braciatur de ordeo et drageto tunc percipiet in ebdomada xxj quartario v eskeppas et dimidiam videlicet de braseo ordei ad grutmalt vij quartario et dimidium et de drageto xiiij quartario j eskeppam et dimidiam Quando vero braciatur de maismalt quod est pro majori parte de avena tunc percipiet in ebdomada xxiiij quartario j eskeppam et dimidiam videlicet de braseo ordei vij quartario et dimidium et de maismalt xvij quartario v eskeppas et dimidiam Percipiet eciam qualibet ebdomada j quartarium de braseo ordei ex dono et concessione nostra preter omnem assisam brasei supra notatam Et si aliquid predictorum frumenti brasei vel pisarum ad opus conventus minus utile fuerit queratur in villa vel alibi quod melius poterit inveniri ad custus abbatis Volumus eciam et ordinamus et statuimus quod conventus de cetero habeat omnes proventus et utilitates secundum capituli ordinationem que poterunt provenire de omnibus et singulis supranotatis Ita quod dictus conventus per abbatem et suos ministros qui pro tempore fuerint omni solacio et quiete gaudeat ut decet suo perpetuo Et ne aliquis abbas futurus ad ulteriorem liberationem teneatur ex debito nisi aliquid facere voluerit graciose nec ad excusationem predicte liberationis faciende nec ad retardationem subtractionem seu diminutionem aliquam obstare valeat vacatio abbatie aut caristia vel defectus cuiuscumque bladi quin liberatio predicta custodi granarii conventus ad suam et suorum sustentationem ac consuetam hospitalitatem faciendam plene fiat sine aliqua diminutione Si vero placuerit et oportunum videatur conventui pistrinum et bracinum habere separatum bene liceat eidem nova construere in loco conpetenti sine contradictione cuiuscumque et famulos sibi in ipsis ordinare et suis sumptibus sustentare Et ut ista ordinatio et concessio nostra perpetue firmitatis robor optineat presens scriptum sigilli nostri munimine una cum sigilli capituli appositione roboramus