Charter Document - 01760238

Officialis domini archidiaconi Norht universis decanis per dictum archidiaconatum constituti salutem in salutis auctore Litteras venerabilem virorum Dei gracia London et Lincoln episcoporum verius eciam litteras reverendi patris nostri domini R[oberti] permissione divina Cantuar archiepiscopi recepimus ad infra scripta exequenda Set quia diffusum esset et longum omnes articulos in dictis litteris contentos transcribere vim et effectum earum quatenus vos contingit mittimus vobis omnibus et singulis firmiter injungendo quatinus singuli vestrum abbates et priores electivos exemptos et non exemptos ac conventus eorum prout in vestris existunt decanatibus citetis peremptorie quod iidem abbates et priores personaliter conventusque per eorum abbates et priores seu per alios procuratores quos duxerint eligendos coram predicto patre domino R[oberto] Cantuar archiepiscopo una cum ceteris prelatis et procuratoribus provincie Cantuar in ecclesia cathedrali London sexta feria post octavas Pasche compareant super crimine heretice pravitatis singularibus personis ordinis militie Templi inposito tractaturi et ordinaturi sicut alias nec non et ad alia que in provinciali concilio ordinabuntur consensum adhibituri ulteriusque facturi et recepturi in eodem consilio quod cum prorogatione dierum fuerit faciendum Ad hec quisque vestrum clerum sui decanatus peremptorie faciat citari auctoritate nostra quod die Jovis in septimana Pasche proxime futura in ecclesia parochiali Rowell coram nobis compareat per procuratorem idoneum qui sufficientem habeat potestatem alium procuratorem pro archidiaconatu nostro eligendi et constituendi ad comparendum coram domino J[ohanne] Dei gracia [] proximo die juridico post octavas Pasche in ecclesia Omnium Sanctorum Norht seu eius locum tenentibus [] Habeat que dictus procurator in promptu singulos quadrantes de qualiter marca juxta ultimam taxationem pro sumptibus procuratorum tam London ad predictum consilium quam Norht coram predicto patre mittendorum