Charter Document - 01760188
| Charter Number: | 01760188 |
|---|---|
| Cartulary Title: | The White Book of Peterborough. The Registers of Abbot William of Woodford, 1295-99 and Abbot Godfrey of Crowland, 1299-1321. |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1304 |
| Date type: | Internal, A.D., Feast |
| Resource Link(s): |
|
Charter:
Omnibus Christi fidelibus presens scriptum visuris vel audituris Godefridus permissione divina abbas de Burgo Sancti Petri et eiusdem loci conventus salutem in Domino Noveritis nos pro nobis et successoribus nostris concessisse Johanni filio domini Gregorii de Lullington militis rationabilem sustentationem in tota vita ipsius Johannis pro se duobus garcionibus et duobus equis in abbacia nostra de Burgo Sancti Petri cum camera competenti et stabulo pro duobus equis suis in abbacia nostra predicta Ita videlicet quod predictus Johannes cum superioribus libere familie abbatis de Burgo et successorum suorum in aula ipsius abbatis ad mensam declinet et admittatur et garciones sui cum garcionibus ipsius abbatis et successorum suorum in mensa admittantur Et si contingat quod predictus Johannes causa infirmitatis vel alia causa necessaria honesta ad mensam in aulam predicti abbatis et successorum suorum accedere nequiverit volumus et concedimus pro nobis et successoribus nostris quod idem Johannes recipiat de cellario ipsius abbatis et successorum suorum singulis diebus duos panes albos duas lagenas bone cervisie et unum ferculum integrum de coquina abbatis et successorum suorum cum uno intermisso et garciones sui in aula predicta in victualibus cum garcionibus ipsius abbatis et successorum suorum recipiantur et quod idem Johannes recipiat pro equis suis cotidie fenum sufficiens et octavam partem quartarii avena in prebenda pro eisdem et focale sufficiens tempore yemali in camera sua prout alii liberi famuli recipiunt in cameris suis tempore predicto Et idem Johannes recipiet singulis annis de garderoba ipsius abbatis et successorum suorum duas robas unam videlicet de meliori secta vallettorum ad festum sancti Martini et aliam ad Pentecosten sibi pro statu suo convenientem cum futuris decentibus et decem libras sterlingorum annuatim in abbacia predicta ad quatuor anni terminos videlicet ad festum sancti Johannis baptiste quinquaginta solidos ad festum sancti Michaelis quinquaginta solidos ad natale Domini quinquaginta solidos et ad Pascha quinquaginta solidos Istam conventionem fideliter facere promittunt dicti abbas et conventus pro se et successoribus suis in tota vita ipsius Johannis sub pena quadraginta marcarum eidem Johanni solvendarum cum eos [si] contigerit quod absit in predicta conventionem eidem Johanni minus plene satisfacere aut desistendo deficere In cuius rei testimonium huic presenti scripto sigilla nostra fecimus apponi Datum in capitulo nostro die Martis proxima post festum sancti Marci evangeliste anno Domini MIIJ quarto