Charter Document - 01760126

Bonifacius episcopus servus servorum Dei karissimo in Christo filio Edwardo regi Anglie illustri salutem et apostolicam benedictionem nova grandia fili karissime nova felicia nova utique gaudiis prosequenda precipuis nuper nobis de orientalibus partibus fidedignis litterarum et nunciorum affectibus illuxerunt que fidelium ad modum delectant auditum corda letificant animosque demulcent Ideo que tibi veluti Christianissimo principi et devotissimo ecclesie filio ea tenore presentium digne quam tocius reserando decernimus ut in eorum perceptione gratissima jocunderis in Domino tuique pectoris intima letitie copiose dulcoribus repleantur licet iam forsitan nova eadem sensibus regiis fame precurrentis assertio revelavit Sane rex excelsus filius summi regis qui sua virtuose potentia in orbe terrarum mira et stupenda mortalibus jugiter operatur quique superborum cornua conterit enervat vires molimina vacuat temerarios ausus frenat diligenter considerans et sollerter attendens in gentem Christianorum regum et principum fideliumque ceterorum desidiam que prout evidentia facti docet a longe retro temporibus commissa dinoscitur circa recuperandam de impiorum manibus Terram Sanctam quam illorum nefanda temeritas non sine multo tocius Christianitatis obprobrio ab olim miserabiliter detinens occupatam ipsam tandem redegit in cinerem et favillam diebus proximo iam transactis de sue benignitatis clementia suffocavit spiritum animum tetigit cor accendit viri magnifici genti Tartarice dominantis qui nondum renatus fonte baptismatis nondum orthodoxe fidei lumine illustratus ad Christi laudem et gloriam arma sumens eiusque prosequens ferventur obsequia et exponens pro illis totaliter se et sua potenti et copioso exercitu congregato habito que presidio karissimorum in Christo filiorum nostrorum Jurgianorum et Armenie regum illustrium contra soldanum gentis Babilonice dominum crucis hostem precipuum et Christiane fidei inimicum ac multitudinem Saracenorum innumeram quam eius soldani dampnata nequitia congregarat duxit hostiliter procedendum et demum divini favoris auxilio prefati Tartareorum domini triumphante potentia eiusque dextera prevalente Saracenorum ipsorum in estimabili facta cede Soldanus ipse nimio terrore perterritus menteque consternatus et animo ad fuge remedium se convertit quem idem dominus Tartarorum predictorum regum [munimine] circumfultus per longa terrarum spacia promptis animis et victricibus signis explicitis prosequi non quievit tota terra illarum partium fugientibus incolis vel verius gladio trucidante subducto restituta seu reddita Christianis O inquam inestimabilis pietas O inmensa benignitas salvatoris quis meruit quid ve illius induxit clementiam Ut tante plenitudine gracie tantique muneris donativo fidelium populos prosequi sic que circa illos effundere sue misericordie multitudine dignaretur verum quis princeps catholicus non miretur et stupeat quis fidelis non erubescat obnixius et rubore non perfundatur uberrimo vultus eius quod Rex Celorum et Dominus cuius humiliter parent imperio universa tantam et tam gloriosam victoriam per ministerium hominis nondum supra petram fidei constituti voluit modernis temporibus exerceri cum sicut celsitudo regia non ignorat tui progenitoris potissime utpote fide preclari et devotione sinceri predicte Terre Sancte custodiam exercere continue tueri que potenter ab hostibus dum temporalis vite cursum perageretur noscebantur salubriter exponendo propterea quicquid poterant quicquid erant ceteros christianorum reges et principes ad ea non sine laudum sonoro preconio propensius inducendo Cum igitur grandi non inmerito cupiamus affectu nostraque ad id fervens dirigatur intentio ut Terra Sancta grave jugum Agarenorum effugiat quod iam diutini temporis spacio toleravit et de ipsorum celestis manibus liberetur omnino ea que ad divini numinis glorie exaltationem fidei ac tocius Christianitatis honorem vigilantibus studiis in statu prospero conservetur regalem magnificentiam rogamus et hortamur attente ac obsecravimus in filio Dei patris quatinus ob divinam et apostolice sedis reverentiam tueque salutis et exaltationis augmentum tanquam filius benedictionis et gracie et progenitorum tuorum vestigia clara sequens tue ample subventionis et potentie brachium circa ipsius terre subsidium ac succursum sollerter extendere non omittas ut et quod de ipsa terra et aliis ultra marinis regionibus per christianos solitis retineri recuperandis supersit recuperari valeat et quod recuperatum est et recuperabitur reedificari et firmari valeat ac muniri ac salubriter retineri ut cultus divinus inibi observetur Deo diurne ac nocturne laudes a fidelibus cum devotione solvantur et multiplicentur ut augeantur ibidem fides catholica et populus christianus et ex diversis mundi climatibus regnis atque provinciis ad partes illas fideles concurrant ad inhabitandum et defendendum partes easdem et quod adquisitum fuerit dante Domino retinendum sic te in hiis prout necessitatis articulus exigit habiturus quod terra ipsa tuo et aliorum regum et principum adiuta suffragiis auxiliis circumfulta favente Domino cui nichil impossibile cernitur ad statum tranquillum et prosperum reducatur perpetuis futuris temporibus in illo stabiliter permansura Ceterum te ignorare non volumus quod dictarum terre ac partium statu et conditionibus in maturam deliberationem adductis nobis temporibus istis non videtur expectandum passagium generale Licet ad id suo tempore faciendum plenus affectibus intendamus quia per illud quod dilationem recipit dictis terre et partibus valde dampnosam non succurretur eis tempore oportuno Ideoque per accelerationem succursus et ne commoditas ac clementia celesti concessa perdatur providimus per diversa regna et ad regiones excitare corda fidelium qui ante Lugdunense concilium generale ultimo celebratur vel post illud crucis signaculum assumpserunt ut in dicte terre succursum cum celeritate qua poterunt generali non expectato passagio personaliter ad terram ipsam se conferant et reddant inibi altissimo vota sua ad quod ipsos multum debet excitare devotio quia loca sancta liberata de Saracenorum manibus poterunt visitare Providimus quoque quod omnes prelati ecclesiarum terre regionum et partium earumdem qui sunt citra mare transfretent et revertantur illuc necnon persone ecclesiarum earundem indignitatibus seu personatibus constitutis statuentes ut crucesignati hactenus pro dicte Terre Sancte succursu et qui ad huc inantea signum vivifice crucis assument et illuc transibunt personaliter non expectato passagio generali et ibi tanto tempore morabuntur quanto moraturi essent si transirent in dicto passagio generali eandem indulgentiam quam haberent si transirent in eodem passagio generali assequantur sicut hec et alia super hoc ordinata per nos in aliis litteris nostris serio continentur tu que nobis plenius intimare non differas quid de tuo procedat consilio in hac parte qualiter eciam intendas et velis omnino te super hoc nostris et apostolicis sedis beneplacitis coaptare Datum Lateran vij idus Aprilis Pontificatus nostri anno vj