Charter Document - 01760124
| Charter Number: | 01760124 |
|---|---|
| Cartulary Title: | The White Book of Peterborough. The Registers of Abbot William of Woodford, 1295-99 and Abbot Godfrey of Crowland, 1299-1321. |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1300 |
| Date type: | Internal, A.D., Feast, Regnal |
| Resource Link(s): |
|
Charter:
Pateat universis per presentes quod ita convenit inter abbatem et conventum de Burgo Sancti Petri ex una parte et abbatem et conventum de Suleby ex parte altera videlicet quod predicti abbas et conventus de Burgo Sancti Petri concesserunt pro se et successoribus suis quantum in ipsis est quod predicti abbas et conventus de Suleby libere et sine impedimento possint ingredi manerium de Parva Adyngton cum suis pertinenciis Et illud tenere et habere sui et successoribus suis inperpetuum Quod quidem manerium Ricardus filius Gervasii de Bernak aliquando tenuit de Humfrido de Bassyngburn qui illud tenuit de abbate predicto de Burgo Sancti Petri per servitium feodi unius militis Et pro hac concessione habenda dicti abbas et conventus de Suleby concesserunt pro se et successoribus suis quod reddent singulis annis predictis abbati et conventui de Burgo Sancti Petri et eorum successoribus sex solidos et octo denarios argenti ad Pascha in manerio suo de Castre et quod facient sectam ad curiam ipsius abbatis de Burgo Sancti Petri de Castre de tribus septimanis in tres septimanas per abbatem de Soleby qui pro tempore fuerit et eius successores abbates vel eius attornatos inperpetuum Concesserunt eciam predicti abbas de Suleby et conventus pro se et successoribus suis quod quilibet abbas de Suleby post istum abbatem die confectionis presentium existentem quocumque modo succedens solvet pro qualibet vacatione dictis abbati et conventui de Burgo Sancti Petri et eorum successoribus inperpetuum decem marcas argenti nomine relevii apud Burgum Sancti Petri infra octo dies postquam fuerit creatus abbas de Suleby Et idem abbas de Suleby et successores sui predictis abbati et conventui de Burgo Sancti Petri et eorum successoribus fidelitatem de cetero facient pro predictis tenementis Et abbas de Burgo Sancti Petri et eius successores non obstante conventione ista homagium et scutagium et omnia servitia regalia per manus Humfridi de Bassyngburn et heredum et assignatorum suorum recipient de predicto tenemento inperpetuum Et predicti abbas de Suleby et conventus concesserunt pro se et successoribus suis inperpetuum quod predicti abbas et conventus de Burgo Sancti Petri et eorum successores pro voluntate sua in dicto manerio cum pertinenciis distringere possint tam pro predictis decem marcis redditu et secta quam pro aliis quibuscumque serviciis de eodem manerio cum pertinenciis quoquomodo provenientibus et ad ipsos abbatem de Burgo Sancti Petri et conventum et eorum successores inde qualitercumque spectantibus Et eciam pro serviciis regalibus inde debitis cum aliquid inde arretro fuerit In cuius rei testimonium huic scripto in modum cyrograffi confecto et penes predictos abbatem et conventum de Suleby remanenti predicti abbas et conventus de Burgo Sancti Petri sigilla sua apposuerunt Hiis testibus domino Rogero de Heygham domino Hugone Daundeleyn domino Roberto de Veer militibus magistro Roberto de Kyuelingworth magistro Galfrido de Makes Johanne de Undele Roberto de Thorp et aliis Datum apud Burgum Sancti Petri die Sabbati in vigilia Pasche anno Domini M tricentesimo et anno regni regis Edwardi filii regis Henrici vicesimo octavo