Charter Document - 01760120

In primis ad honorem et gloriam omnipotentis Dei et gloriose Virginis matris sue et beati Thome protomartyris ordinamus diffinimus et inviolabiliter observari discernimus quod hospitale beati Thome martyris supra pontem Stannford cum suis juribus et libertatibus per custodem eiusdem hospitalis proposse custodis absque diminutione custodiatur et tueatur Item quod universa bona ad custodem dicti hospitalis nomine eiusdem hospitalis pervenientia de terris reditibus necnon obventionibus ex devotione fidelium et industria custodis provenientibus tripliciter dividantur et distribuantur pro equalibus portionibus prout primevo tempore fundationis dicti hospitalis et post de consuetudine loci didicimus veraciter fuisse observatum videlicet quod una pars sustentationi cantarie continue per sacerdotem ydoneum in dicto hospitali residentem divina celebrantem infirmis ac peregrinis sacramentalia ministrantem ac inventioni et sustentationi luminaris vestimentorum et aliorum ornamentorum pro divini obsequii ministerio necessariorum in hospitali predicto contribuatur que per vos magistrum H[ugonem] dicti hospitalis custodem singulis annis precipimus fieri et injungimus vobis sub pena in littera submissionis vestre contenta Alia pars predictorum bonorum sustentationi elemosine infirmis commorantibus necnon pauperibus peregrinis ibidem confluentibus ministrande juxta tercie partis divise facultates inpendatur Roberto Wodefoul ad congruam sustentationem prout ipsius forma conventionis requirit in camera sibi antiquitus deputata absque molestia recepto cui de arreragiis pro annali prestatione dimidiam marcam per vos magistrum H[ugonem] subtracte prefato Roberto debitis ordinamus et precipimus satis fieri competenter Tercia parte bonorum sustentationi custodis sue familie necessarie et honeste salva remanente Ordinamus insuper et diffinimus quod suspecte persone dissipatores bonorum dicti hospitalis provocantes contentiones inter vos prefatum H[ugonem] et vicinos vestros necnon tenentes comitis Warenn et tenentes nostros per conficta mendacia et falsas detractiones a dicto hospitali et bonorum participatione eiusdem deleantur nec de cetero sustineantur quovis modo de bonis hospitalis antedicti sive parentes fuerint vel extranei sustentatione luminaris in dicto hospitali tam in lampadibus quam in aliis debiti et consueti plenaria restituta que ob reverenciam sanctorum in dicto hospitali ante tempus vestre subtractionis honorifice ministrabatur Reliquias sanctorum in dicto hospitali per vos prius inibi inventas et per vestram simplicitatem vel aliorum maliciam postea amotas precipimus revocari et restitui cum cura et diligencia debitis prout vobis possibile erit Ad hec ordinavimus et discernimus quod singula loca in dicto hospitali divino obsequio ac pauperum et infirmorum receptioni antiquitus mancipata inmaculata conserventur nec rerum aliarum custodiis deputentur set fiat congruis reformatio per vos custodem vice nostra in personis et rebus dicti hospitalis quod affectiones fidelium trahantur ad antiqui subsidii impensi exemplum et dispersa revocentur salva retentione congregatorum sane illicite occupationes circa litigia et controversias caritatem perfectam impediunt necnon bona custodienda consumunt rancoris calore et aviditate vindicte ac insurgunt rixe et contentiones ceteros inflammantes et imponentes ira commoti convalescentiam vestri languoris in statum pristinum vel deteriorem esse conversam Et quod absit evenient posteriora prioribus peiora volentes vobis et aliis sub districtu nostro existentibus per nostram presentem ordinationem et diffinitionem juris et caritatis intuitu quietem parere et scripulum erroris pro viribus exstirpare ordinamus discernimus et diffinimus quod materie contentionum inter vos magistrum H[ugonem] et dominum Robertum rectorem ecclesie de Northburg et ceteros nostros ministros et tenentes quoscumque cuiuscumque conditionis existant sub dominice potestatis nostre vel districtu existentes coram quibuscumque judicibus exhorta ex nunc conquiescant ac per nos amicabili discissione absque strepitu judiciali inordinato cessante favore equo labore libramine terminantur quod si prefati vestri adversarii coram nobis juri ac equitati parere non curaverint vestre prosecutioni coram judice competenter faciende subsidium impendi faciemus oportunum Retinemus insuper nobis plenam potestatem premissis addendi et eorum quodlibet si necesse fuerit mutandi declarandi interpretandi corrigendi subtrahendi supplendi seu de novo ordinandi et diffiniendi quotiens et quando nobis visum fuerit expedire Salvis in omnibus nobis et monasterio nostro juribus et libertatibus circa dispositionem personarum et rerum in dicto hospitali existentium necnon reditibus et serviciis debitis et consuetis ac prestationibus personalibus et realibus subjectionibus universis Ad suprascripta ordinamus et diffinimus quod si vos magister Hugo contra formam sacramenti vestri prestiti premissis in nostra ordinatione et diffinitione contentis vel eorum aliquo quod absit minime parere volueritis premissis ordinationi vel diffinitioni in toto vel in parte reluctando ex tunc vos a custodia dicti hospitalis necnon omni comodo bonorum et obventionum eiusdem auctoritate presentis ordinationis et decreti ac sacramenti vestri prestiti decernimus amoveri potestate nobis de alio custode providendi et eundem in corporalem possessionem eiusdem hospitalis et bonorum existentium in eodem introducendi et successoribus nostris salva et libera remanente In cuius rei testimonium presenti ordinationi diffinitioni et decreto sigillum nostrum apposuimus Datum apud Burgum in festo sanctorum Tyburtii et Valeriani anno Domini M tricentesimo Et ego H[ugo] de Sancto Martino suprascriptas reformationes ordinationes diffinitiones et decretum sponte et reverenter in toto et in parte suscepi premissis et eorum cuilibet proposse parere virtute sacramenti mei corporaliter prius prestiti promitto In cuius rei facti mei testimonium presentibus sigillum meum apposui