Charter Document - 01760031

Anno regni regis Edwardi vicesimo quinto die sancti Bartholomei apostoli facta est hec conventio inter abbatem de Burgo Sancti Petri et eiusdem loci conventum ex parte una et abbatem de Thorn et eiusdem loci conventum ex altera videlicet quod dicti abbas et conventus de Thorn et successores sui decetero sicut actenus consueverunt libere et pacifice possint obstruere et reparare quotiens opus fuerit quemdam cursum aque qui descendit et exit de ripa de Nene usque ad quemdam locum qui vocatur Inggewelle sine aliquo inpedimento predictorum abbatis et conventus de Burgo vel successorum suorum vel hominum suorum inperpetuum Ita videlicet quod obstructio et reparatio illa fiat sumptibus et expensis abbatis et conventus de Thorney et successorum suorum et de ipsorum terra propria vel lignis et lapidibus sine diminutione vel clamio soli seu alio dampno faciendo in solo abbatis et conventus de Burgo Sancti Petri aut successorum suorum vel hominum suorum inperpetuum et quod latera illius obstructionis seu reparationis sint cum prato et terra adjacente ex utraque parte equalia sed in medio ita competenter basiorum ut cum cursus aque infra abitum ripa sit prata circumadjacentia per nimiam exaltationem illius obstructionis citius non inundentur Et quod predicti abbas et conventus de Thorney et successores sui a predicto loco de Inggewelle usque ad salices super stagnum ipsorum abbatis et conventus de Thorn crescentes quotienscumque necesse fuerit defectus si qui per inundationem aquarum emerserint sumptibus suis propriis et de terra sua propria habeant decetero obstruere et reparare Ita quod dampnum exinde pro defectu reparationis non perveniat abbati et conventui de Burgo vel eorum successorum inperpetuum Istum articulum promiserunt et concesserunt abbas et conventus de Burgo pro se et successoribus suis predictis abbati et conventui de Thorney et successoribus suis quantum in ipsis est et ad eos pertinet sine prejudicio aliorum A capite vero salicium usque ad molendina de Neuthon infra salices super stagnum versus ripam die confectionis presentium crescentes vel infra metas et bundas de consensu partium positas et concessas nec predicti abbas et conventus de Burgo nec successores sui aliquid juris vel clamii poterint exigere vel vendicare inperpetuum nec eciam predicti abbas et conventus de Thorn nec eorum successores aliquid extra salices ultra metas et bundas predictas decetero exigere vel clamare poterunt inperpetuum sed abbas et conventus de Thorn et eorum successores de loco qui vocatur Inggewelle usque ad molendina si cursum aque in alveo sustentabunt et obturabunt ne pro defectu competentis sustentationis et reparationis dicti abbas et conventus de Burgo vel eorum successores aut eorum tenentes in pratis circumadjacentibus dampnum incurrant seu jacturam in futurum Liceat insuper abbati et conventui de Burgo et eorum successoribus quandocumque eis placuerit absque aliqua contradictione vel impedimento predictorum abbatis et conventus de Thorney vel successorum suorum liber piscari de predicto loco de Inggewelle usque ad barreram in stagno fixam die confectionis istius scripti et similiter sub molendino ubi aqua dividit inter terras ipsorum abbatum vel hominum suorum Pro hac autem conventione quieta clamatione obstructionis et reparationis concessione dicti abbas et conventus de Thorney et eorum successores concesserunt reddere annuatim abbati et conventui de Burgo et eorum successoribus inperpetuum dimidiam marcam argenti solvendam in manerio predictorum abbatis et conventus de Burgo de Castre ad duos anni terminos videlicet ad festum sancti Michaelis tres solidos et quatuor denarios et ad Pascha tres solidos et quatuor denarios Ad quem quidem redditum loco et terminis predictis solvendum predicti abbas et conventus de Thorn pro se et successoribus suis obligant se et omnes terras et tenementa sua in villa de Makesey ad quorumcumque manus devenerint districtioni predictorum abbatis et conventus de Burgo et successorum suorum In cuius rei testimonium []