Charter Document - 01760019

Robertus permissione divina Cant archiepiscopus tocius Anglie primas venerabili fratri domino R[icardo] Dei gracia London episcopo salutem et fraternam in Domino caritatem Satis per diversa frater conscripte mundi climata perlato rumore diffunditur et auribus hominum inculcatur sicut nos cotidianis gestorum experimentis et oculata fide perpendimus qualiter natale solum in quo peregrinationis presentis dies agimus dispendiosis incommodis atteritur et variis exteriorum injuriis labe scitur Dum enim gens Anglorum ambiguis fatis guerrarum et horrendis bellorum aggressibus non vacabat felici embola personarum excrescentium et rerum copiosis affluentiis redundabat Sed nunc pacis emulus et caritatis non ficte perfidus inimicus sic nos et dictam gentem hostium insidiis undique circumcinxit sicque captiosa tendicula iam tetendit et innumerabilium aciem bellatorum in nos omnes convertit atque alia pericula nobis et ecclesie anglicane clero pariter atque regno imminentia fallaciter preparavit quod patrata strage multorum non sine dampnationis eterne plurium interitu prout dolor animarum iam decrevit excrescens numerus gentis nostre fons affluentie rerum exaruit et quod graviter est gerendum nisi seva sevientium audacia licitis defensionibus reprimatur et eidem favente Domino competentibus prout convenit remediis occurratur nos et ecclesiam antedictam clerum eciam ac ceteros regnicolas ad desolationis irreparabilis detrimentum quod absit perduci posse violenter presumimus et verisimiliter formidamus Ne igitur flagitiosis et repentinis hostium incursionibus opprimamur et nostri et ecclesie cleri ac regni predictorum subversionem vel exterminium minus provide patiamur tutum esse nuper censuimus et consultum casibus huiusmodi quos ut premisimus instantes esse probabiliter committimus et evidenter attendimus quantum licite possumus salubriter obviare Quocirca fraternitati vestre committimus et mandamus firmiter injungendo quatinus cum celeritate debita omnes et singulos coepiscopos et suffraganeos nostros in nostra Cant provincia constitutos convocando citetis seu citari peremptorie faciatis ut cessante legitimo impedimento quod si pretensum fuerit coram nobis nisi tunc legitime doctum fuerit de eodem nullatenus admittetur die sancti Hillarii proximo sequente apud Sanctum Paulum London ad tractandum et ordinandum nobiscum dicto die et diebus sequentibus proximis quamdiu videbitur oportunum qualiter pro tuitione universalis ecclesie anglicane cui non tam in temporalibus quam in spiritualibus una cum regno clero eiusdem et ceteris regnicolis periculum grande nimis ut prediximus dinoscitur imminere in necessitatum seu periculorum huiusmodi articulis quantum ad nos at alios viros ecclesiasticos licite pertinet salubriter provideri valeat suam exhibeant presentiam personalem in virtute sancte obediencie qua nobis et ecclesie nostre Cant juxta sue professionis seriem juramento personaliter prestito sunt astricti necnon sub pena districtionis canonice cuius rigorem exercere dante Deo disponimus contra convocationis seu citationis edictum totaliter contempnentes aut eciam quesitis coloribus sese frustratorie excusantes electos quoque confirmatos presentes necnon absentium episcoporum vel electorum vicarios seu procuratores ad dictos diem et locum sub pena consimili et in forma predicta citetis aut citari peremptorie faciatis Denunciantes nihilominus prefatis episcopis electis presentibus et tam episcoporum quam electorum absentium vicariis et eisdem auctoritate nostra districtius injungentes quatinus quilibet in sua seu sibi commissa dioecesi citet aut citari faciat peremptorie omnes decanos precentores cancellarios thesaurarios archidiaconos et priores cathedralium ecclesiarum necnon abbates non exemptos ac eciam omnes priores decanos prepositos magistros conventualium et collegiatarum ecclesiarum et alios universos in dignitate constitutos quocumque nomine censeantur capitula quoque omnium prelatorum et clerum ut videlicet decani precentores cancellarii thesaurarii archidiaconi et abbates non exempti priores prepositi magistri et alii ut premittitur in dignitate constituti personaliter singula vero capitula huiusmodi tam secularium quam religiosorum predictorum per unum clerus autem cuiuslibet dioecesis per duos procuratores ad tractandum et ordinandum nobiscum tractatibus ordinationibus que in premissis et circa premissa seu occasione premissorum faciendis ac omnibus tractatus et ordinationes huiusmodi contingentibus nomine dominorum suorum consentiendum plenam et sufficientem ac specialem potestatem habentes dictis die et loco conveniant seu compareant eodem die et sequentibus oportunis una nobiscum facturi quod superius memoratur sub pena excommunicationis majoris et interdicti que merito poterunt formidare qui in forma prenotata contumaciter omiserint seu contempserint comparere et que contra eosdem qui sic comparere detrectaverint sine delectu personarum intendimus executioni debite demandare Denuncietis insuper episcopis electis et vicariis singulis supradictis quod in suis dioecesibus omnibus exemptis cuiuscumque fuerint conditionis ordinis seu professionis notificent manifeste ut prefatis die et loco absque aliquali privilegiorum suorum prejudicio quibus per hoc non intendimus per hoc derogare una nobiscum sufficienter intersint facturi in premissis et ea contingentibus prout superius est expressum cum commune sit periculum et per consequens communibus absque cuiusque fori privilegio remediis congruis devitandum et quod omnes tangit merito debet ab omnibus approbari Dictis et episcopis electis et vicariis districtius injungatis ut nos memoratis die et loco singuli certificare procurent per litteras patentes harum seriem continentes una cum nominibus [omnium] ecclesiarum et monasteriorum secundum formam predictam citandorum qualiter presens mandatum in suis dioecesibus vel eisdem commissis fuerint executi Et vos eisdem die et loco et diebus sequentibus similiter personaliter intersitis facturi cum ceteris quod incumbit De die vero receptionis presentium et quid in premissis feceritis nos distincte et aperte ibidem reddentes inter cetera certiores per litteras vestras patentes harum seriem exprimentes Valete semper in Christo Datum apud Bocking [v kalendas Decembris anno Domini MCC nonagesimo sexto consecrationis nostre tercio]