Charter Document - 01760006

Bonefacius [servus servorum Dei] Ad perpetuam rei memoriam clericis laicos infestos oppido tradit antiquitas quod et presencium experimenta temporum manifeste declarant dum suis finibus non contenti nituntur invetitum ad illicita frena relaxant nec prudenter attendunt quam sit [eis] in clericos ecclesiasticas ve personas et bona interdicta potestas ecclesiarum prelatis ecclesiis ecclesiasticis que personis regularibus et secularibus inponunt onera gravia ipsos que talliant et eis collectam inponunt ab ipsis suorum proventuum vel bonorum dimidiam decimam seu vicesimam vel quamvis aliam portionem aut quotam exigunt et extorquent eos que molliuntur multifarie subicere servituti sue que ditioni submittere et quod dolentes referimus non nulli ecclesiarum prelati ecclesiastice que persone trepidantes ubi trepidandum non est transitoriam pacem querentes plus timentes majestatem temporalem offendere quam eternam talium abusibus non tam temerarie quam inprovide adqiescunt sedis apostolice auctoritate seu licencia non optenta Nos igitur talibus iniquis actibus obviare volentes de fratrum nostrorum consilio apostolica auctoritate statuimus quod quicumque prelati ecclesiastice que persone religiose vel seculares quorumcumque ordinum [conditionis] seu statum collectas vel tallias dimidiam decimam [vicesimam seu centesimam] suorum que ecclesiarum proventuum vel bonorum [laicis solverint vel promiserint vel se soluturos consenserint aut quamvis aliam quantitatem portionem aut quotam ipsorum proventuum vel bonorum] estimationis vel valoris ipsorum sub adjutorii mutui subventionis subsidii vel doni nomine seu quovis alio titulo modo vel quesito colore absque auctoritate sedis eiusdem necnon imperatores reges seu principes duces vel comites vel barones potestates capitanei officiales vel rectores quocumque nomine censeantur civitatum castrorum seu quorumcumque locorum constitutorum ubi libet et quivis alius cuiuscumque preeminentia conditionis et status qui talia inposuerint exigerent vel receperint aut apud edes sacras deposita ecclesiarum vel ecclesiasticarum personarum ubi libet arestaverint seysierint seu occupare presumpserint vel arestari seysiri aut occupari mandaverint aut occupata seysita seu arestata receperint necnon omnes qui scienter in predictis dederint auxilium consilium vel favorem publice vel occulte eo ipso sentenciam excommunicationis incurrant Universitates quoque que in hiis culpabiles fuerint ecclesiastico supponimus interdicto Prelatis et personis ecclesiasticis supradictis in virtute obediencie et sub depositionis pena districte mandantes ut talibus absque expressa licencia dicte sedis nullatenus adquiescant quod que pretextu cuiuscumque oblationis promissionis vel concessionis factarum actenus vel faciendarum in antea priusquam huiusmodi prohibitio constitutio seu preceptum ad noticiam ipsorum pervenerint vel solvant nec supradicti seculares vel quoquo modo recipiant et si solverint aut predicti receperint excommunicationis sentenciam incidant ipso facto A supradictis autem excommunicationis et interdicti sentenciis nullus absolvi valeat preterquam in mortis articulo absque sedis apostolice auctoritate et licencia speciali cum nostro intentionis existat tam horrendum secularium potestatum abusum nullatenus sub dissimulatione transire non obstantibus quibuscumque privilegiis sub quibuscumque tenoribus formis seu modis aut verborum conceptione concessis imperatoribus et regibus et aliis supradictis que contra premissa in nullo volumus alicui vel aliquibus suffragari Nulli ergo omnino hominum [liceat] hanc paginam constitutionis nostre prohibitionis seu precepti infringere vel ei ausu temerario contraire Si quis autem [hoc attemptare presumpserit indignationem omnipotentis Dei et beatorum Petri et Pauli apostolorum eius se noverint incursurum] Data Rome apud Sanctum Petrum vj kalendas Marcii pontificatus nostri anno secundo