Charter Document - 01640187

Universis [Chris]t[i] fidelibus presens scriptum visuris vel audituris Frater Nicholaus Prior S[an]cti Thome juxta Staffordiam et ejusdem loci conventus eternam in Domino salutem Non solum naturalis racionis instinctus verum etiam nostre religionis institucio pariter et norma nos exitant edocent et inducunt ut benefactores nostros pro bonis temporalibus in beneficiis spiritualibus remunerare debeamus Cum ergo dilecta nobis quondam in [Chris]to Domina Roysia de Standon tam inter vivos quam in sua voluntate ultima varia et multiplices nobis contulerit honores et beneficia quorum pretextu eidem et suis ad bona spiritualia non immerito tenemur concedimus et tenore presentium nos et successores nostros in perpetuum obligamus ad inveniendum de cetero quendam capellanum de Canonicis nostris pro anima ipsius Roysie et animabus heredum suorum de Standon et animabus omnium fidelium defunctorum missam que vocatur Requiem singulis diebus in ecclesia nostra apud Sanctum Thomam celebrandum et quod Dominus Robertus de Standon filius suus et heredes sui possint presentare clericum idoneum nobis et successoribus nostris quem nos et successores nostri sine more dispendio in fratrem et canonicum nostrum admittere teneamur et idem sic admissus quam cito fuerit in presbiterum ordinatus pro ipsa Roysia [] predictis singulis diebus celebret in forma antedicta Ipso vero in aliis ordinibus constituto vel alias quocunque modo ad dictam missam celebrandam inpedito vel forte viam universe carnis ingresso teneamur nos et successores nostri ad presentacionem predictorum alium idoneum admittere in forma eadem et loco ipsius qualitercunque inpediti vel admissi et in Presbiterum non ordinati alium idoneum ad dictam missam singulis diebus celebrandam interim subrogare Subjicientes nos et successores nostros in perpetuum specialiter in hac parte jurisdiccioni et choercioni Domini Coventrensis et Lichfeldensis episcopi qui pro tempore fuerit ita ut in qualibet visitacione sua vel extra cum per predictum Robertum de Standon vel heredes suos fuerit requisitus tam de admissione dicti clerici quam dicte misse celebracione per se vel suos inquire valeat ad plenum modo quo melius sibi viderit expedire et quatenus nos vel successores nostros in aliqua parte premissorum rebelles cessantes seu negligentes invenerit eatenus suo periculo nos et successores nostros prout decet canonice puniat Et ad omnium et singulorum premissorum observanciam futuris temporibus per quamcumque caucionem magis sufficientem hiis quorum interest exponendam nos et successores nostros compellat In cujus rei testimonium tam nos pro nobis et successoribus nostris quam dictus D[omi]n[u]s Robertus pro se et heredibus suis huic scripto alternatim ad modum cyrographi confecto sigilla nostra apposuimus Data apud Sanctum Thomam die Lune in Octabis Purificacionis B[eatae] M[ariae] Virginis MCCXCII A[nno] D[omini] Hiis testibus D[omi]no Reginaldo de Lego D[omi]no Willielmo de Mere D[omi]no Willielmo de Stafford D[omi]no Henrico de Karsewalle D[omi]no Ricardo de Draicote Thoma Meverell Henrico de Colton Willielmo de Colton clerico et aliis