Charter Document - 01540173

Universis Christi fidelibus presentem paginam inspecturis de Bildewas et de Rufford Abbates eternam in Domino salutem Noveritis quod [] inter Abbates de Deulacres et de Hulton mota et nobis a capitulo generali commissa amicabile compositione tali fine conquievit videlicet quod Abbas et conventus de Deulacres concesserunt pro se et successoribus suis in perpetuum quod Abbas et Conventus de Hulton pacifice possidebunt locum suum de Mixne sicut modo fossato includitur concesserunt etiam eisdem situm bercarie sue et quod licebit eis salva utriusque et hominibus suis competenti via ad communam pasturam includere circa bercariam duodecies xx acras per perticam xx pedum ita quod quicquid redactum fuerit ad culturam de predictis duodecies xx acris solvent dicti Abbas et Conventus de Hulton decimas ex integre sine aliqua subtractione et sciendum quod post amotionem bladi et feni dictarum duodecies xx acrarum dicti Abbas et Conventus de Delacres pacifice habebunt liberum ingressum et exitum pro averiis suis et hominum suorum ad usum herbagii sine aliqua contradictione ville etiam de Bradenop et de alia Bradenop et de Mildelchf non amovebuntur solitas decimas ecclesie de Lech persolventes et dabunt dicti Abbas et Conventus de Hulton dicti Abbati et Conventui de Deulacres dimidiam marcam annuatim pro bono pacis scilicet xl d in annunciationem Domini quamdiu dictas duodecies xx acras tenuerunt clausas si vero non fuerunt clause solvent tamen v solidos pro bono pacis ad predictos terminos Pro hac autem concessione et remissione dicti Abbas et Conventus de Hulton concesserunt et fideliter promiserunt dictis Abbati et Conventui de Deulacres quod de cetero nulla alia novalia facient nec aliquid includent aut sibi appropriabunt aliquid in parochia de Lech aliqua ratione absque conscensu et voluntate dictorum Abbatis et Conventus de Deulacres Concesserunt etiam eisdem Abbati et Conventui de Deulacres communiam pasturam de Morrug aracio et omnibus porcis suis Concesserunt etiam eisdem communiam pasturam pro ducentis averiis suis tempore estatis cum nutritura ultra aquam de Chirnet averia autem de Hulton et hominum suorum communicabunt usque ad aquam predictam extra divisas de Birchou sciendum vero quod si homines de Deulacres deliquerunt erga Abbatem de Hulton vel homines de Hulton erga Abbatem de Deulacres absque ulla cavillatione et malicia in curiis eorum mensurate secundum quantitatem delicti amerciabuntur et punientur si vero monachus vel Conventus de Deulacres vel de Hulton dicto vel facto contra hanc compositionem venire presumpserit monachus sive conversus de Hulton super hoc convictus ad portam de Deulacres pedes veniat ad arbitrium Abbatis vel Prioris dicte domus satisfacturus Similiter monachus vel conversus de Deulacres si in aliquo deliquerunt contra istam compositionem pedes veniat ad portam de Hulton ad arbitrium Abbatis vel Prioris de Hulton Ut autem hec compositio firmitatis robur obtineat in perpetuum nos de Buldewas et de Rufford Abbates presenti scripto una cum sigillis partium sigilla nostra apposuimus Teste utroque capitulo Actum anno domini MCCL secundo in Vigilia Pentecoste