Charter Document - 01471147
| Charter Number: | 01471147 |
|---|---|
| Cartulary Title: | Durham Annals and Documents of the Thirteenth Century |
| Charter Language: | Latin |
| Charter Origin: | Religious |
| Charter Type(s): | Threat |
| Date: | 1258 - 1273 |
| Date type: | Assigned |
| Resource Link(s): |
British Library - Stowe MS 930 (f16v) |
Charter:
Hugo prior Dunelmensis priori de Coldingham [] Quoniam filius sapiens et obediens letificando patrem suum recto nomine filius uocari comprobatur ex contrario patet quod [non] est filii nomine dignus censeri cuius uoti transgressio temeraria presumcio contumacie et inobediencie supersticio in patris sui obprobrium in tocius religionis quantum in ipso est subuersionem ac in proprie salutis dispendium patent redundare Huiusmodi agitatur filius ille qui superiorem suum et capitulum in cuius sinu suauiter ab inicio fuerat ablactatus nutritus et ad quandam perfeccionem deductus paruipendens eorum mandati honestis quibus ex professione sua et uoto obediencie tenetur astrictus in suarum preiudicium libertatum hactenus obtentorum contra deum et iusticiam contumaciter obtemperare contempnit Proth dolor fili karissime ad uos dirigitur sermo iste qui nedum hiis contenti estis set hiis maiora accumulare molientes aliorum consilio sinistro nobis detrahendo scisma inter nos procurare proponitis Cum enim nuper uobis pro negociis et negociorum necessitatibus nos et domum nostram contingentibus utpote in debitis et arreragiis nobis soluendis scripserimus vos voti et ordinis uestri immemores cum magnatibus aliis a nobis et quibus non decuit secreta nostra communicando tanquam pro accepta ab eis sentencia nos et mandata nostra pro paruo uel nichilo habentes contumaciter ac temerarie ab eorum sentencia quos dicta minime tangunt negocia asseritis nunquam uita comitante recedere adicientes iure iurando vos nunquam pro peccunia nobis et domui nostre debita vnam ouem uendituros que quidem uerba nichil aliud pretendunt quam euidenciam presumpcionis et contumacie licitis et Cham ridet detecta uidens secreta parentis et perpetue omnium fratrum suorum seruituti addictus est Pericula igitur hec et maiora nos et uos si negligenter dissimulauerimus in hac parte ad precipitium quod absit dampnacionis trahencia declinare cupientes discrecionem uestram excitando monemus et exhortamur in domino atque in uirtute Obediencie in qua nobis et capitulo Dunelmensi tenemini sub pena excommunicacionis et interdicti uobis districte precipiendo mandamus quatinus consilio saniori innitentes sicut condignam rebellibus ac excommunicatis infligendam uultis euadere ulcionem nobis sicut decet ac mandatis [nostris] obtemperare curetis nobis in illa summa peccunie in qua nobis tenemini uel saltem in summa uobis per nuncios nostros ostensura infra festum instans Beati Iohannis Baptiste satisfacere nullo modo omittentes alioquin ex tunc auctoritate dei patris omnipotentis et nostra excommunicacionis sentencia uos innodamus et ab ingressu ecclesie ac fratrum diuinorum sacramentorumque communione sequestramus denique protestantes ex tunc omnes fratres uobis cum communicaturos eadem sentencia fore ligatos Valete