Charter Document - 01448010

Omnibus Christi fidelibus ad quos presens scriptum pervenerit Ricardus Dei permissione Sarum Ecclesie minister humilis salutem gratiam et Dei benedictionem Considerantes quod in pluribus locis in quibus olim fervor caritatis vigebat multorum caritas refrigescat et quod in hospitibus recolligendis et in aliis operibus misericordie quod non sine dolore dicimus plus solito multorum tepescat devotio illorum qui in nostra consistunt dyoecesi caritatem si forte obdormierit pre ceteris specialius exhortationibus tenemur excitare et ad hospitalitatem sectandum non solum verbis sed etiam benedictionibus ac largitionibus efficaciter provocare ea propter cum ad hospitalitatem sectandam efficacior sit exhortatio re quam voce facto quam verbo ut aliorum ad bonum hospitalitatis efficacius intendatur devotio de assensu et voluntate capituli nostri dedimus intuitu caritatis Deo et ecclesie Sancti Aldhelmi de Malmesburia et monachis ibidem Deo servientibus ad augmentum hospitalitatis omnes decimas garbarum in parochia ecclesie de Creddewelle et cappellarum suarum de Hanekyntone videlicet et de Estcote nomine perpetui beneficii futuris et perpetuis temporibus possidendas exceptis decimis garbarum triginta duarum virgatarum terre quarum viginti tres sunt in Cheggelewe et novem apud Tothulle versus Esseleye in eadem parochia Qum quidem decime garbarum una cum quibusdam aliis inferius notatis cedent in portionem persone rectoris ecclesie de Creddewelle qui pro tempore fuerit a nobis vel successoribus nostris ad presentationem abbatis et conventus de Malmesburia ad memoratam ecclesiam admittendus et instituendus ac in eadem in ordine sacerdotali quem cura illius ecclesie requirit continuam facturus residentiam Habebit autem dictus rector ecclesie memorate preter dictas decimas garbarum terras ecclesie et capelle de Hanekyntone cum pratis et pascuis et omnibus aliis ad eas pertinentibus et omnes decimas preter decimas garbarum ut predictum est et preter decimas feni de proprio abbatis quod in presenti tenet dominico Similiter habebit omnes obventiones altaris et cimiterii ecclesie de Creddewelle et capellarum memoratarum sicut Henricus de Curtenay et Radulfus vicarii de Hanekyntone habere consueverunt Is autem qui pro tempore fuerit rector sepe dicte ecclesie omnia onera consueta et consuetudines episcopales et archidiaconales sustinebit Volumus etiam et concedimus ut illas tres marcas quas ecclesia de Malmesburia ab antiquo de ecclesia de Creddewelle percipere consuevit ad indicium hujusmodi nostre donationis nomine predicti perpetui beneficii quamdiu Henricus de Curtenay nunc rector ecclesie de Creddewelle vixerit annuatim de cetero percipiat Cum vero de predicto Henrico humanitus contigerit dictus abbas et conventus de Malmesburia libere et sine contradictione alicujus possessionem predicti beneficii ingrediantur et novam possessionem veteri quam per receptionem trium marcarum retinuerunt sine difficultate continuent Et licet monachi ibidem Deo servientes pro nobis orare teneantur et ut ad id faciendum eorum magis provocetur devotio et ut anniversarium nostrum cum de nobis humanitus contigerit libentius singulis annis faciant cum pleno servicio pontificali dedimus insuper eisdem intuitu Dei de assensu capituli nostri ad necessitatem monachorum de infirmaria in aliquo relevandam capellam villule sue de Northone salva competenti sustentatione vicarii perpetui in eadem capella perpetuis temporibus ministraturi Ita ut qui administrator coquine monachorum pro tempore fuerit de portione ad infirmariam pertinente infirmario fideliter et integre respondeat salva debita et antiqua pensione annua duorum solidorum quos infirmarius sacriste de Malmesburia persolvat Has autem pias concessiones nostras episcopali auctoritate confirmamus et sigilli nostri ac capituli Sarum appositione communimus salvis in omnibus jure et dignitate Sarum Ecclesie et nostra et successorum nostrorum Ad majorem etiam securitatem super predictis concessionibus duo confecta sunt instrumenta sub eisdem omnino verbis et tenore concepta quorum unum remanebit penes monasterium Malmesburie aliud in thesaurario Ecclesie Sarum cui sigilla abbatis et conventus de Malmesburie sunt appensa Datum Sarum per manus magistri R de Hertford tunc cancellarii xvi Kal Februarii pontificatus nostri anno quinto Hiis testibus Magistro Willelmo de Waude tunc decano Sarum Magistro Willelmo de Badesdon precentore Abraham thesaurario Magistro Ricardo archidiacono Wyltescyre Magistro Willelmo de Mertone tunc offic Magistro Luca Magistro Ricardo de Scorestane Johanne capellano Magistro Ricardo de Bremele Magistro Petro Malesmeyns et multis aliis