Charter Document - 01440088

Universis Christi fidelibus presens scriptum inspecturis Willelmus Dei gratia abbas Malmesburie et ejusdem loci conventus salutem in Domino sempiternam Cum nos de Puritone et de Minti ecclesias in quibus jus optinemus patronatus cum advocationibus juribus et pertinentiis earundem universis ordinationi statuto seu provisioni venerabilis patris domini Roberti Dei gratia Sarum episcopi earundem ecclesiarum dioecesani submiserimus promittentes pro nobis et successoribus nostris nos ratum habituros et acceptum omni tempore quicquid idem dominus episcopus de eisdem ordinandum duxerit statuendum seu providendum ac idem dominus episcopus erga nos et monasterium nostrum pietate motus sui capituli ad hoc accedente consensu ecclesiam de Puritone cum suis juribus et pertinentiis universis salva in eadem vicaria competenti nobis et successoribus nostris ad sustentationem hospitum et egenorum in proprios usus perpetuo concesserit prout in ordinatione dicti domini episcopi plenius continetur ecclesiam vero de Minty cum suis juribus et pertinentiis omnibus archidiacono Wyltiscirie in recompensationem dampnorum et interesse que ex appropriatione predicte ecclesie de Puritone que in archidiaconatu ipso sita est eidem futuris temporibus contingere possint equitate que alterius conditionem ita meliorem fieri permittit quod alteri ex hoc prejudicium non paretur motus duxerit annectendum statuens quod archidiaconus Wyltescyrie quicumque pro tempore fuerit ecclesiam ipsam de Mynti cum eam cedente vel decedente rectore ejusdem qui nunc est vel aliter vacare contigerit libere ingredi possit et eandem cum archidiaconatu predicto habeat et possideat tanquam unicum beneficium inperpetuum et simul quotiens vacaverint ecclesia ipsa et archidiaconatus per eundem dominum episcopum et successores suos alicui ydonee persone conferantur Nos ordinationem seu provisionem predictam pro nobis et successoribus nostris ratam habentes et acceptam advocationem seu jus patronatus et totum jus quod habemus seu habuimus in eadem ecclesia de Minty prefato domino episcopo et successoribus suis donamus et inperpetuum concedimus per presentes ut ipse et successores sui ecclesiam ipsam cum archidiaconatu cui voluerint libere conferant et hiis cui eandem duxerint taliter conferendam ecclesiam ipsam habeat et pacifice teneat in futurum Ita quod nos vel successores nostri in ecclesia ipsa de Minti seu patronatu ejusdem nihil juris vel clamii de cetero vendicare possimus vel habere In cujus rei testimonium presenti scripto sigilla nostra apposuimus Datum apud Malmesburiam die apostolorum Symonis et Jude anno Domini MCCLXX sexto