Charter Document - 01430215

Uniuersis Christi fidelibus presentes litteras inspecturis Gwydo officialis venerabilis patris domini Willelmi dei gracia Elyensis episcopi salutem et memoriam rei geste Cum nuper nobilis domina Dyonisia de monte Caniso in manerio suo de Waterbeche Elyensis dyoceseos monasterium pia deuocione suis sumptibus fundauerit construxerit et abbatissam et sorores minorissas ordinis Sancte Clare plantauerit in eadem ipsumque manerium suum eisdem sororibus dono perpetuo contulerit ad sustentacionem earum ac S[ymon] Prior et conuentus de Bernewelle rectores eiusdem ecclesie de Waterbeche et Constantinus perpetuus vicarius eiusdem se cum instancia opposuerint contra fundacionem et conseruacionem loci predicti asserentes non modicam lesionem eis et ecclesie sue posse et debere contingere et suis successoribus occasione predicta per subtractiones et retenciones minutarum decimarum de lacte vitulis agnis lana ortis pomis oblacionibus confessionibus et alijs ad ipsam ecclesiam de Waterbeche de iure communi debitis et solutis pacifice temporibus retroactis tandem de consilio patris predicti et aliorum amicorum pacem fidelem et honestam desiderancium prefati Prior et conuentus de Bernewelle et Constantinus vicarius pro se et suis successoribus et prefata domina domina Dionisia fundatrix pro se et heredibus suis ac abbatissa et sorores pro se et suis successoribus se super hijs omnibus et singulis nostre ordinacioni sponte et deliberate submiserint per litteras suas patentes quarum tenor de uerbo ad uerbum subscribitur in hac forma [] Nos autem officialis predictus habito super premissis omnibus consulto [et] tractatu consideratis eciam et rite pensatis comodis que prefato monasterio abbatisse et sororum super retencione huiusmodi euenient in futurum ac eciam dampnis et diminucione porcionis eiusdem loci vicarij qui pro tempore fuerit cuius res specialiter agitur in hoc facto in dei nomine tenore presencium ordinamus quod in recompensacionem minutarum decimarum de incrementis animalium propriorum predictarum religiosarum et non aliorum et ortis fructibus arborum viuariorum et alijs minutis [decimis] inclusis ibidem sepultura ac oblacionibus de domina fundatrice et heredibus suis sua libera familia et alijs amicis nobilibus qui cum eis ibidem euenerint et moram ibi fecerint cum eisdem abbatissa et sorores de Waterbeche soluent perpetuo de bonis eiusdem manerij sui predicti vicario de Waterbeche annuatim ad duos terminos viginti et duos solidos sterlingorum in ecclesia parochiali de Waterbeche scilicet ad Pascha vndecim solidos et ad festum Sancti Michaelis vndecim solidos et vicarius nichil aliud petere possit ex causa predicta de seruientibus autem secularibus dictarum religiosarum continue infra portam puta in celario coquina et similibus et vno custode manerio deputato nisi fuerint de parochia de Waterbeche vicarius nichil exigat pro oblacionibus vel confessionibus nisi ex gracia abbatisse de seruientibus autem earum secularibus extra suam portam et clausum laborantibus vt in campis pratis pasturis piscarijs marisco et alijs locis infra parochiam de Waterbeche sine fuerint parochiani siue extranei ordinamus quod iidem seruientes perpetuo faciant oblaciones consuetas matrici ecclesie de Waterbeche saltem quater in anno et ibi percipiant ecclesiastica sacramenta ac si ibi decesserint et alibi debeant sepeliri prima missa cum corpore presenti celebretur in ipsa ecclesia et oblaciones morentur ibidem et quod abbatissa et sorores que pro tempore fuerint possint compelli per episcopum Elyensem et eius officialem omni tempore pro quauis censura ecclesiastica de plano et sine lite ad solucionem predicti census annui seu redditus viginti duorum solidorum loci vicario in forma predicta non obstantibus priuilegijs suis impetratis vel impetrandis quibus quoad hunc actum dumtaxat et non aliter specialiter renunciant et expresse Ordinamus quod predicte religiose seruientes suos seculares vel aliena animalia seu eorum exitum nunquam protegent nec defendent seu defendi permittent in aliquo contra ordinacionem nostram predictam Priorem autem et Conuentum de Bernewelle et eorurn monasterium per hanc nostram ordinacionem in nullo ledi uolumus sed in decima garbarum et feni pasture et alijs libere et plene percipiant sicut ante Et ad huius rei perpetuam securitatem huic scripto in modum cyrographi diuiso sigillum officij nostri duximus supponendum Et venerabilis pater dominus noster Elyensis episcopus sigillum suum ex certa continentia fecit apponi Data et acta apud Waterbeche die veneris in festo Sancte Scolastice uirginis anno domini mcc nonagesimo quarto Testibus dominis Willelmo de Kyrketot et Willelmo Touchet militibus dominis Johanne et Thoma de Redeswelle Henrico de Pentelawe fratribus Johanne de Sancto Eadmundo et Roberto de Swafham canonicis de Bernewelle dominis Johanne Piltani et Waltero Sauuage capellanis domini episcopi et alia multitudine copiosa