Charter Document - 01380375
| Charter Number: | 01380375 |
|---|---|
| Cartulary Title: | The Letters and Charters of Gilbert Foliot [Hereford] |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1163 - 1174 |
| Date type: | Assigned |
| Resource Link(s): |
|
Charter:
Gilebertus Dei gratia Lundoniensis episcopus dilectis in Domino sibi Roberto eadem gratia Hereford[ensi] electo totique eiusdem ecclesie capitulo salutem Que ad pacem ecclesie stabiliendam seu tutius muniendam pertinere dinoscimus iis diligentius assensum dare et ut in perpetuum ualitura permaneant hec scriptis et munimentis aliis roborare caritate id procul dubio suggerente debemus Ea propter fraternitati uestre presenti scripto notificamus causam que inter uenerabilem fratrem nostrum Rogerum priorem Maluernie et Rogerum sacerdotem de Lenhal super ecclesiam de Lenhal diu uentilata est et ob uarios euentus rerum protracta plurimum super qua mandatum apostolicum accepimus ut ei aut finem amicabili compositione imponeremus aut ipsam auditis utrimque partibus canonico fine decideramus in presentia nostra hoc tandem [modo] conquieuisse et finem paci congruum accepisse Predictus siquidem Rogerus de Lenhal ius ecclesie de Maluernia in sepe dicta ecclesia de Lenhal recognoscens ipsam in manu nostra resignauit et priorem [et] ecclesiam de Maluernia per manum nostram apostolica auctoritate eadem inuestiri concessit Quo debita sollempnitate peracto prior totius capituli sui assensu eandem ecclesiam ipsi Rogero per manum nostram apostolica interueniente auctoritate annua dimidie marce pensione in Pascha soluenda tota uita sua tenendam concessit hoc etiam in caritatis augmentum totius capituli sui conniuentia annuens ut cum predictus Rogerus aut uita decesserit aut se ad frugem melioris uite transtulerit Walterus presbiter de Daubo qui in eadem ecclesia nomine Rogeri aliquandiu ministrauit in eadem nomine prioris et ecclesie de Maluernia ministret et usque uel decesserit uel seculari uite renuntiauerit annua marce unius pensione in Pascha persoluende annuatim perpetuus in ea uicarius perseueret Nominato uero Waltero uel obeunte uel se ad religionis habitum transferente ecclesia de Lenhal cum omni integritate sua Maluernensis ecclesie bonis accrescat ipsamque Maluernensis ecclesia de cetero plene possideat Quod quia saluo iure Hereford[ensis] ecclesie ratum inconuulsumque manere decernimus scripti presentis annotatione et sigilli nostri appositione confirmamus Hiis testibus Roberto de Broi Mauricio de Sabricteswrd Rogero de Hereford[ia] Ricardo de Saresber[ia] Lodowico Waltero elemosinario magistro Willelmo de Bernes Hugone capellano de Hedam Samsone clerico prioris Reginaldo camerario Waltero Foliot Ricardo Brudle Iocelino Alano
Source (click image below to view full size)
