Charter Document - 01380294

Dilectis sibi in Domino uniuersis sancte matris ecclesie filiis frater G[ilebertus] Herefordensis ecclesie minister salutem que nunc est et quam speramus a Domino Que litis inquietudine quandoque turbata sunt ipsius sopito fomite denuo reuocantur ad pacem Que nimirum inter aliquos reformata ne facile quibusdam emergentibus causis euanescat ut pactis legitimis firmanda est sic et excipienda scripto et in perpetuam sui soliditatem litterarum memoria testificanda pariter est et roboranda Noscat itaque uestra discretio causam que inter Iohannem clericum et Reginaldum de Pagaham super ecclesia de Credintun diu agitata est que etiam a patre nostro domno papa Alexandro delegata est ut ipsam diligenter audiremus et rationibus partium hinc inde diligenter auditis et cognitis ipsam remoto appellationis obstaculo mediante iustitia decideramus in hunc tandem modum conquieuisse Nam cum Iohannes adducta testium copia iam dictam ecclesiam in integrum sibi restitui postulasset Reginaldus esse sciens ambigua fata causarum anticipando iudicium integram medietatem iam dicte ecclesie Iohanni per omnia concessit sicque cum eo transigendo liti finem imposuit Elegit enim Iohannes oblatam sibi ecclesie portionem potius in pace suscipere quam testes suos probationibus et iuramentis honerare Tactis igitur euangeliis utrimque iuratum est ut neuter alterum sua de cetero portione fraudet sed uterque alteri ius suum integrum illibatumque conseruet sane aliquo ipsorum altero tamen superstite decedente iure suo sibi in partis alterius recuperatione saluo per omnia permanente Quod quia coram nobis actum est nos ad finem pacis cuncta redigi cupientes approbauimus et transactioni in hunc modum inite assensum prebuimus ipsam ut in perpetuum conualescat presenti scripto et sigilli nostri appositione testificando confirmauimus