Charter Document - 01350226

Omnibus Cristi fidelibus ad quos presens scriptum pervenerit W Roffensis archidiaconus persona ecclesie de Frendesbery eternam in domino salutem Noverit universitas vestra me ad promotionem commendabilem domus hospitalis sancte Marie de Strodes resignasse in manus domini G Roffensis episcopi capellam de Strode cum oblationibus obventionibus et omnibus aliis ad eam pertinentibus exceptis decimis bladi Idem autem dominus episcopus de assensu meo et voluntate assignavit et donavit eandem capellam cum memorata integritate sua pauperibus prelibate domus hospitalis de Strode ad sustentationem eorum in perpetuam elemosinam et ipsam capellam constituit matricem ecclesiam et ei cimiterium dedicavit Ita quidem ut tam ipsa quam in ea ministrantes clerici liberi sint et absoluti ab omni exactione pecuniaria videlicet tallia et emenda et omnibus aliis tam erga episcopum quam archidiaconum et decanum loci et omnes alios et ut liceat iconomo domus hospitalis predicti providere quem voluerit presbiterum idoneum de suis sive de aliis ad ministrandum in eadem ecclesia et episcopo diocesano presentare Et hanc emunitatem et ordinationem constituit de assensu et voluntate mea in ecclesiis de Aylisforde et sancte Margarete apud Roff[a]m et de Hallynge et ministrantibus in eis observandam Locum etiam ipsum hospitalem cum ambitu suo et pauperes clericos et laicos ibi conversos sive aliter servientes exemit ab omni potestate archidiaconi et decani loci ut sint subiecti tantummodo sacrosancte Romane ecclesie et Cant archiepiscopo et episcopo loci Ut igitur hec mea resignatio et concessio firma et perpetua valitura permaneat eam presentis carte confirmatione et sigilli mei appositione communivi Testibus hiis magistro Elya senescallo nostro magistro Egidio magistro W de Caun magistro Rogero de Burned Randulfo et Iohanne clericis Waltero de Bro[m] Hugone fratre eius Roberto Marmi[un] Matheo de Capella et multis aliis