Charter Document - 01340052

Ethelredus Dei gracia Abbas Rieuall et Rodbertus Abbas Novi Monasterii et Cuthbertus Prior de Gisburne et Ricardus Prior Hagustaldensis et Germanus Prior de Tinemuthe omnibus Sancte Matris Ecclesia filiis tam presentibus quam futuris salutem Contentionis lites ratione devincere et commenta falsitatis veritatis approbatione destruere est pacis solide fundamenta construere et motus inquietudinum delevere Ea propter universitati vestre notificare cupimus quomodo contentionis seditionem quam inter Rogerum Dunelmensem Priorem et Wazonem Archidiaconum ejusdem ecclesie obortam et versatam in presentia Domini Willelmi Dunelmensis Episcopi nobis assistentibus terminatam comprobavimus Wazo Archidiaconus false seditioni innisus sed nulla veritate suffultus in presentia Domini Willelmi Episcopi calumniando conquestus est quod ei jure Archidiaconatus sui debuisset dextera Episcopi cedere ipseque locum primum et vocem in omnibus post Episcopum et non Prior ipsius ecclesie secundarie possidere Cui venerabilis memoria Prior Rogerus matura religione et veridica attestatione obluctando contradixit et se utpote predecessores suos Aldunum Turgotum et Algarum jure Decani summi debere Archidiaconis omnibus Dunelmensis ecclesie presidere etiam in electione ipsius Episcopi Willelmi vocem primum Domini Pape precepto et auctoritate obtinuisse Convocante igitur Domino Willelmo Episcopo utriusque calumpnie controversias coram omni clero Episcopatus audivimus sed commenta falsitatis respuentes et veritatis argumento innitentes tali fine omnia terminavimus Provectiores enim quique in verbo veritatis attestati sunt quia tempore Willelmi primi et Rannulfi Episcoporum videre Aldunum et Turgotum Priores sedem Abbatis in choro habuisse et sedem primam et vocem et locum utpote summos ipsius Ecclesia Decanos obtinuisse et dexteram Episcopi omnibus diebus usque ad diem illam absque omni calumpnia sustentasse necnon et Archidiaconos quondam illorum regimini subditos fuisse Archidiaconos vero Michaelem et Rodbertum qui Wazonem precesserant nunquam ad hoc officium accessisse Priore in quovis loco presente sed insuper tam in synodis quam in missarum sollempniis si Prior adesse non potuisset Subpriorem pro eo subrogari ut vices sui Prioris incunctanter expleret et assistens Episcopo pro Priore deserviret Hec se usque in illam diem vidisse et audisse seniores quique de Episcopatu contestabantur sed et Archidiaconos nunquam contra Priores aliquid presumsisse profitebantur Nos etiam qui a puero in ipsa patria educati fuimus sic omnia vera fuisse affirmavimus et testificati sumus Nostra igitur et ceterorum omnium veridica attestatione Wazo convictus et confusus appellationi sue quam ad sedem apostolicam fecerat in presentia Willelmi Episcopi et nostra renuntiavit et omnes calumpnia su querelas deposuit et liberas in perpetuum Prioribus Dunelmensibus in manu Episcopi proclamavit Dominus Willelmus Episcopus paci ecclesie sue in posterum providere et consulere eligens omnes predictas libertates Priori et suis sequentibus in perpetuum concessit et inviolabiliter auctoritate sua Episcopali omnia jura Decani eis roborando confirmavit Hec omnia vidimus et audivimus et hujus carte nostre monimento cum sigillis nostris testificamur Testibus Rannulfo Archidiacono et Radulfo de Sancta Columba Nicholao canonico Meldredo clerico Magistro Gregorio de Alclet Heruis de Langecestre Reginaldo presbitero de Hoctun Hugone de Hesingtun Thoma clerico de Aclea Hugone clerico Wazonis Rodberto capellano Ricardo presbitero de Pitindun et multis aliis