Charter Document - 01310013

Memorandum quod die iovis Proxima post Epiphaniam Anno domini mcc quinquagesimo exhibuit i[] de Langetoft procurator abbatis et conventus Sancte Marie Ebor[acensis] in iudicio coram subdelegatis principalium quandam compositionem non animo litem contestandi sed ad differendum causam motam inter thesaurarium Ebor[acensem] et abbatem et conventum Ebor[] in forma subscripta sigillis eorum signatam Quod semel recte finitum est litterarum solet commendari memorie ut sublata litium materia omnis quoque litigandi amputetur occasio Inde est quod veterem et diu agitatam controversiam inter ecclesiam Beati Petri Ebor[acensis] et monasterium Beate Marie amicabili compositione interveniente hoc modo decidere et terminare utriusque loci capitulo placuit Petebat siquidem Ebor[acensis] ecclesia per i[] thesaurarium suum ad cuius videlicet honorem rem que in controversiam ducebatur specialiter pertinere dicebat in subiectionem ecclesie Beate Marie de Aln[] capellam de Mitton[] que in territorio predicte abbatie sita est asseverans quod omnis capelle illius ordinatio tam in sacerdote ibi constituendo quam in decimis percipiendis vel mortuis sepeliendis ad ecclesiam de Aln[] modis omnibus pertinere deberet et per multorum annorum curricula pertinuerit E contra dompnus s[] qui tunc abbas erat et monachi non capellam illam sed matricem ecclesiam esse et ab omni matricis ecclesie subiectione liberam necnon et assensu bone memorie h[] archiepiscopi cimiterii consecratione honoratam fuisse dicebant dumque cimiterio careret se parochianorum corpora libere sepelienda transportasse quocunque volebant Set hac contentione nondum terminata contigit memoratum thesaurarium de suscepti honoris melioratione sollicitum molendinum quoddam quod super aquam que Fossa dicitur situm ad eius honorem pertinebat a loco quo predecessorum suorum tempore diu immobile fuerat ad comodum suum movere illud que molendino monachorum in eadem aqua plus solito vicinum facere Quod quidem monachi ei non licere asserebant dampna ex hoc facto monasterio suo imminere proponentes Qui etiam illum contra pacti federa de eisdem molendinis inter utramque ecclesiam antiquitus contracta venire et insuper piscariam in qua molendinum suum firmaverat usque ad locum quo prius sedem suam habuerat ex integro iuris sui esse dicebant Dum itaque thesaurarius de prenominata capella ecclesie sue iniuriam fieri conquereretur et eidem ab abbate et monachis de molendini sui transpositione obiceretur tandem in hanc pacis formam decursum est ut abbati et monachis liberum sit in prenominata capella clericum quem voluerint constituere qui et decimas omnium parochianorum recipiat et eosdem cum viam universe carnis ingressi fuerint in eodem loco sepeliat et thesaurariis qui pro tempore erint molendinum suum in loco ad quem translatum supra memoratum inconcusse possidere liceat Et sic iidem monachi de prenominata capella trium solidorum pensionem thesaurario annuatim persolvent dimidiam videlicet ad Pentecosten et dimidiam ad festum Sancti Martini Sic decimam partem totius emolumenti molendini thesaurarii obtinebunt in opcione sua habentes vel eandem partem in manu propria retinere vel de monasterio suo pro annua pensione tenend cui voluerint concedere Sciendum quoque est neutrum molendinorum a loco quo hac lite sopita firmata fuerint alteri approximando debere moveri nec cuiuslibet molendini stagnum cum alterius detrimento magis eminens quam tempore compositionis contracte fuerit posse fieri Et ut omnis occasio litigandi amputetur piscaria a molendino monachorum usque ad pontem solis eorum usibus debetur illa vero a ponte versus aquilonem est thesaurario tamen Ebor[acensi] ex tunc mancipata fuisse dinoscitur Sicut igitur monachis predictam pensionem non licet minuere vel subtrahere nec in prefato molendino ultra quam superius diffinitum est aliquid exhigere sic nec canonicis vel thesaurariis qui pro tempore erint licebit aliquid ulterius in prenominata capella sibi petere nec quod in eodem molendino monachis concessum est quicquam mutare nisi forte thesaurario Ebor[acensi] visum fuerit molendinum suum ad pristinum locum transferre Quod si contigerit ex tunc monachi de sepedicta capella xiii solidorum pensionem ad predictos terminos thesaurario supramemorate ecclesie annuatim persolvent manus suas ab hoc quod in molendino suo habebant ex toto continentes ceteris quidem omnibus ratis que de capella superius diffinita sunt et utroque molendino et piscaria quantum ab uno ad alterum ex tunc extendetur in suo antiquo statu permanentibus Hec itaque omnia ad perpetuam utriusque ecclesie pacem provisa utriusque capituli sigillo roborata omnibus diebus firma et inconcussa permaneant Testibus hiis Roberto decano Iohanne thesaurario magistro Simundo Nicholao de Traylly Thoma de Ramavilla Geroldo canonico Willelmo Bayocensi Willelmo filio Holdebi