Charter Document - 00990231

Universis Christi fidelibus hoc presens instrumentum visuris vel audituris Willelmus permissione divina Norwyc[] episcopus salutem in Christo Noverit universitas vestra quod cum dudum inter religiosos viros priorem et conventum ecclesie nostre sancte Trinitatis Norwic rectores ecclesie de Northelmham nostre dyocesis seu ipsam ecclesiam in proprios usus optinentes ex parte una et dominum Robertum ipsius ecclesie de Northelmham vicarium ex altera quedam coram nobis suborta fuisset controversia seu questionis materia super eo videlicet quod prefati religiosi dicebant dictum vicarium et predecessores ac successores suos vicarios in ecclesia predicta ratione ample portionis vicarie eiusdem assingnate teneri et astrictos esse ex antiqua approbata et optenta consuetudine in dicta ecclesia observata ad supplectionem et refectionem cancelli ipsius ecclesie et ornamentorum eiusdem tam infra quam extra quotiens et quando in coopertura seu aliis quibuscumque refectione seu reparatione indiguerit et supportandum omnia onera eidem cancello incumbentia violatos existere dictumque cancellum per defectum ipsius Roberti vicarii in coopertura in quadam parte eiusdem minare ruinam Petentes ipsum vicarium ad supplendum defectum huius cooperture per nos compelli et coherteri nec non et tam ipsum quam eius successores vicarii in vicaria supradicta ad predicti cancelli reparationem et defectum eiusdem supplectionem cum in aliquo indigeat in premissis seu aliquo premissorum teneri et astrictos esse occasione predicta juxta consuetudinem antedictam decerni ac compellendos fore cum indiguerit declarare compelli ac coherteri Necnon et ipsos religiosos et eorum successores a premissa reparatione supplectione seu refectione immunes esse et semper exstitisse pronuntiare dictumque vicarium et eius successores in eadem quo ad premissa et alia queque onera eidem cancello incumbentia seu emergentia onerarum et eisdem religiosis in omnibus justiciam exhiberi jure beneficio sibi semper salvo Super hiis omnibus et singulis habita diutina altercatione inter partes memoratas tandem placuit eisdem quod nos et magister Johannes de Feryby officialis noster in predicto negotio summare procedentes sine strepitu judiciali prefatum negotium breviori modo quo sine jure injuria fieri poterit decidamus et illud sine debito terminemus Nosque eidem negotio finem inponere volentes inquisita rei veritate premissorum de consensu partium earumdem per viros fide dignos per easdem partes electos ad hoc specialiter vocatos et examinatos per quam inquisitionem notorie constabat prefatum vicarium eiusque predecessores et successores in eadem vicaria ratione ample portionis de bonis ipsius ecclesie vicarie eiusdem assingnate ad omnia onera supradicta supportanda et supplenda totaliter fuisse et esse oneratos et astrictos et huiusmodi onera semper a tempore cuius contrarii memoria non existit per se absque aliquo juvamine dictorum religiosorum in hac parte supplevisse de bonis vicarie supradicte Cumque nichil ex parte dicti vicarii propositum seu objectum fuerit canonicum quod nostram pronunciationem debeat differre vel etiam retardare Assumpto nobis prefato officiali nostro premissis consideratis ac omnibus rite peractis partibus instantibus et nostram pronunciationem expectantibus de jure peritorum nobis assidentium consilio spiritus sancti gratia invocata prefatum vicarium et successores suos vicarios in ecclesia supradicta qui pro tempore fuerint in futurum ad omnia onera supradicta eidem cancello tam infra quam extra qualitercumque incumbentia seu etiam emergentia plene supplenda et suis sumptibus perpetuis temporibus supportanda et sustinenda juxta consuetudinem prenotatam teneri oneratos et astrictos esse decernimus et ipsos compellendos fore quotiens indiguerit declaramus prefatosque religiosos et eorum successores quo ad premissa ex nunc esse et actenus semper exstitisse inmunes et exemptos sententialiter et diffinitive in hiis scriptis pronuntiamus Memorato vicario et eius successoribus qui pro tempore fuerint vicarii in ecclesia prenotata ne ipsos religiosos aut eorum successores in posterum super premissis seu aliquo premissorum inquietare seu molestare presumat aut presumant perpetuum silentium imponentes sub pena majoris excommunicationis quam in hiis scriptis in omnes contravenientes ex nunc ex certa scientia duximus preferrendam In quorum omnium testimonium ad perpetuam rei memoriam huic instrumento ad modum cyrographi indentato sigillum nostrum ad causas et sigillum officialis ecclesie nostre Norwic fecimus apponi Data et acta in manerio nostro de Thorp juxta Norwicum undecimo kalendas Octobris anno domini millesimo ducentesimo septuagesimo septimo