Charter Document - 00912044

Manerium de Erdinthone in possessione ecclesie de Eygnesham per multum tempus mansit Et quidam Remigius tunc Lincolniensis episcopus peciit illud manerium sibi acomodari ut ibi possit per aliquod tempus perhendinare et ei concessum erat et paulo post dictus Remigius in fata decessit seysitus de dicto manerio tanquam de acomodatione et dominus Henricus rex Anglie secundus seysiauit baroniam dicti episcopi dictum manerium de Erdinthone quod manerium dictus dominus rex tradidit cuidam Bernardo de Sancto Walerico quem Godefridus abbas de Eygnesham sepius conuenit coram rege de iure suo sed nichil profecit Optulit ei Bernardus homagium sed recusante abbate Godefrido Robertus secundus Lincolniensis episcopus suscepit illud saluo iure abbatis et conuentus de Eygnesham defuncto illo Godefrido successit ei quidam abbas Robertus nomine qui dictum Bernardum implacitauit per breue de recto in curia eiusdem Willelmi tunc Lincolniensis episcopi sed episcopo ante finem placiti defuncto abbas Robertus in curia regis Iohannis placitauit et electi sunt duodecim homines legales de vineto quibus ad curiam apud Suthwike conductis et pro dicto manerio iuramentum prestare paratis suspense querele omnes usque ad redditum regis de transmarinis partibus Abbas Robertus cito postea migrauit ad dominum successit ei abbas Adam qui per breue de recto in ius uocauit Thomam de Sancto Walerico in curia domini Lincolniensis episcopi et cum iam comparere oporteret turbacio regni exorta est per aduentum Lodewyci in Angliam et siluerunt leges in arma Thoma quoque non longe postea defuncto translata est per filiam suam hereditas ad Robertum Comitem de Brus quem per litteras regias in cur[iam] regis in ius tractum cum iustitiarii Oxon[iam] de[uen]issent et iuratores electi essent presentes diesque instaret [in quo res] ad iudicium proferri debuisset allate sunt littere regie Robertum seysinam perdidisse omnium que habebat in Anglia et custodiam terrarum suarum traditam esse domino Ricardo fratri domini regis