Charter Document - 00910576

Pateat uniuersis per presentes quod nos abbas et conuentus monasterii de Egnesham ordinis sancti Benedicti Lincolniensis diocesis ecclesiam parochialem de Meritone eiusdem diocesis cum suis iuribus et pertinenciis uniuersis per reuerendum patrem dominum Iohannem dei gracia Lincolniensem episcopum ad instanciam excellentissimi principis domini Edwardi dei gracia regis Anglie et Francie illustris et domini Hibernie eidem patri in hac parte pro nobis specialiter supplicantis sub certa forma unitam incorporatam et annexam nobis et monasterio nostro predicto in usus proprios optinentes ac uolentes ut debemus eidem domino episcopo et ecclesie sue Lincolniensi recompensacionem debitam et condignam pro omnibus fructibus et commoditatibus quos tempore uacacionum eiusdem ecclesie de Meritone idem capitulum Lincolniensis et predecessores sui episcopi Lincolnienses a tempore et per tempus cuius contrarii memoria hominum non existit iure et nomine Lincolniensis ecclesie de dicta ecclesia de Meritone pacifice et notorie perceperunt ac consueuerunt percipere et habere singulis temporibus uacacionum ipsa uacacione durante sicut iustum fuerit exibere ac sufficientem et idoneam super hoc sibi cautionem parare fatemur nos et monasterium nostrum predictum ex causa premissa eidem domino episcopo et successoribus suis episcopis Lincolniensibus teneri et per presens scriptum firmiter obligari eidem domino episcopo Lincolniensi et successoribus suis episcopis eiusdem loci in quadam annua pensione sex solidorum et octo denariorum sterlingorum nomine indempnitatis ecclesie Lincolniensis predicte eidem domino episcopo Lincolniensi et successoribus suis predictis apud Lincolniam in festo sancti Michaelis in mense Septembri annuatim per nos et successores nostros imperpetuum persoluenda Ad cuius quidem annue pensionis solucionem dictis die et loco annuatim ex causa premissa imperpetuum fideliter faciendam obligamus nos et successores nostros et monasterium predictum ac omnia bona nostra spiritualia et temporalia eaque submittimus in hac parte districcioni et cohercioni cuiuscunque ecclesiastici uel secularis iudicis competentis Et ne per aliqua subterfugia quod absit seu cauillaciones solucio dicte pensionis in futurum impediri uel differri contingat seu fraudulenter procuretur renunciamus sponte pure simpliciter et expresse quibuscunque appellacionibus excepcionibus prouocacionibus pro nobis uel successoribus nostris faciendis necnon in integrum restitucionibus querelis ac litteris apostolicis per nos uel illos forsitan impetrandis et aliis iuris remediis quibuscunque ac proibicionibus regiis et cuiuscunque alterius curie ecclesiastice uel secularis per quas uel que solucio dicte pensionis differri possit seu quomodolibet impediri Et si contingat forsan imposterum nos seu successores nostros in solucione dicte pensionis in aliquo termino deficere uel cessare extunc concedimus et uolumus pro nobis et successoribus nostris quod liceat episcopo Lincolniensi qui est et qui pro tempore erit omnes fructus redditus et prouentus ad dictam ecclesiam de Meritone et quascunque alias ecclesias nobis in diocese Lincolniensi appropriatas pertinentes obuenientes et obuenturos propter dictas cessacionem et dilacionem etiam nobis ad id primitus non uocatis libere sequestrare et facere sequestrari ac nobis tuto tener[i] sequestro donec dicta pensio cum suis arreragiis uniuersis ac dampnis et expensis que et quas idem episcopus ob hoc sustinuerit et fecerit seu incurrerit quouismodo bona fide ipsius episcopi ostendendas declarandas et taxandas absque aliquo iuramento probacione seu iudiciali processu eidem domino episcopo per nos fuerit integre persoluta Et nichilominus uolumus pro nobis et successoribus nostris ex uberiori cautela quod si nos aut successores nostros in termino aliquo solucionis dicte pensionis deficere contigerit pro qualibet uice defectus huius quadraginta denarios choristis ecclesie Lincolniensis persoluere teneamur suprascriptis omnibus ratis manentibus et in suo robbore per omnia nichilominus duraturis In quorum omnium [] Datum in domo nostra capitulari monasterii nostri predicti x Kalendas Nouembris anno domini MCCC quinquagesimo quarto