Charter Document - 00910536

Edwardus dei gracia [] balliuis Margarete regine Anglie de manerio suo de Bloxham salutem Cum nuper ad querelam dilecti nobis in Christo abbatis de Egnesham nobis suggerentis quod cum ipse et predecessores sui abbates eiusdem loci a tempore cuius contrarii memoria non existit tenuerint quandam placeam terre vocatam La Forsakenho tanquam pertinentem ad manerium suum de Cherlebury vos pretendentes placeam illam ad dictum manerium de Bloxham quod eadem regina tenet in dotem de hereditate nostra pertinere cum non pertineat eandem placeam in manum ipsius regine cepistis uoluntarie et iniuste eam prefato abbati taliter detinendo in ipsius abbatis graue dampnum et ecclesie sue de Egnesham exheredacionis periculum manifestum uolentes super premissis certiorari et quod iustum fuerit ulterius fieri in hac parte assignauerimus dilectos et fideles nostros Iohannem de Foxle Iohannem de Westcote et Galfridum de Padebury uel duos eorum ad inquirendum per sacramentum proborum et legalium hominum de comitatu Oxon per quos rei ueritas melius sciri posset utrum placea predicta pertinet ad dictum manerium de Cherlebury sicut predictum est et utrum predictus abbas et predecessores sui predicti placeam illam tanquam pertinentem ad manerium illud tenuerint et a quo tempore et qualiter et quo modo et an idem abbas inde eiectus fuisset sicut predictum est et quando et qualiter et quo modo ac per inquisicionem inde coram prefatis Iohanne et Iohanne iuxta formam mandati nostri in presencia uestra et aliorum ministrorum ipsius regine captam et in cancellariam nostram retornatam compertum sit quod predictus abbas et predecessores sui predicti tenuerunt placeam illam tanquam pertinentem ad manerium suum de Cherlebury a tempore cuius contrarii memoria non existit et quod idem abbas per uos alio modo eiectus non est nisi quod uos iam per decem annos elapsos postquam predictus abbas dictam placeam assartari fecit et eam tenentibus suis tradidit tenendam de eo ad uoluntatem suam pro certo redditu ei annuatim reddendo eundem abbatem impediuistis ita quod redditum inde prouenientem hucusque percipere non potuit et quod idem redditus adhuc in manibus ipsorum tenentium integre existit propter impedimentum uestrum pro eo quod ipsum abbatem pro predicto redditu distringere non permisistis nos eidem abbati nolentes iniuriari taliter in hac parte uobis mandamus quod de placea predicta uos ulterius non intromittatis saluo iure nostro et ipsius regine si quid nobis competat cum uoluerimus inde loqui Teste me ipso apud Dyttone xiii die Octobris anno regni nostri nono