Charter Document - 00910496
| Charter Number: | 00910496 |
|---|---|
| Cartulary Title: | The Cartulary of the Abbey of Eynsham |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1281 - 1307 |
| Date type: | Assigned |
| Resource Link(s): |
Bodleian Library - Christ Church MS 341 (f113r) |
Charter:
Uniuersis [] Thomas permissione diuina abbas Egneshamie et eiusdem loci conuentus salutem in domino sempiternam Nouerit uniuersitas uestra nos Iohanni de Christescherche cementario pro laudabili seruicio officii sui quod nobis et domui nostre hucusque impendit et quamdiu uixerit et laborare poterit fideliter est impensurus ad quod iuramento se astrinxit dedisse et concessisse pro nobis et successoribus nostris uictum et uestitum suum in domo nostra de Egnesham ad totam uitam suam in forma subscripta uidelicet quolibet die unum panem monachalem et unum panem seruientum et unum galonem et dimidium ceruisie melioris et unam robam contra Natale Domini de secta clericorum cum furura et pro omnibus aliis necessariis quadraginta solidos bone et legalis monete annuatim ad quatuor anni terminos consuetos pro equalibus porcionibus diuidendos ac fideliter eidem ad eosdem terminos persoluendos Si autem dictus Iohannes infirmatus fuerit uel tanta debilitate affectus quod amplius laborare nequiuerit nichilominus omnia supradicta cum honesta camera infra abbathiam sibi assignata uel assignanda percipiet sine diminucione et fraude nec licebit de cetero predicto Iohanni alicui alii seruire uel ad seruiendum se obligare sine nostro et successorum nostrorum assensu et licencia speciali In cuius rei testimonium huic scripto in modum cirographi confecto partes alternatim sigilla sua apposuerunt Datum in capitulo nostro []